प्रधानमन्त्री कप महिला क्रिकेटमा लुम्बिनी प्रदेशकाे जित

काठमाडौँ- प्रधानमन्त्री कप महिला राष्ट्रिय क्रिकेट प्रतियोगितामा आइतबार लुम्बिनी प्रदेशले कर्णाली प्रदेशलाई १० विकेटले पराजित गरेको छ । धनगढीस्थित फाप्ला क्रिकेट मैदानमा भएको दिनको पहिलो खेलमा कर्णाली प्रदेशले ६ ओभरमा तीन विकेट गुमाएर १७ रन बनाएको थियो । हुस्सुका कारण ६ ओभरमा घटाइएको खेलमा लुम्बिनीले ३.१ ओभरमा २१ रन बनायो । 

कर्णालीका लागि आयुसा टण्डनले सर्वाधिक सात रन जोडेकी थिइन् । त्यसैगरी दिक्षा गिरीले पनि अविजित सात रन बनाए । यी दुईबाहेक ब्याटिङ गरेका दिभ्या धामी र अन्जु गुरुङले एक–एक रन बनाए भने तिर्सना विश्वकर्मा शून्यमै आउट भइन् । पहिलो खेलमा प्रदेश १ को सामना गरेको कर्णाली ६ रनमा अलआउट भएको थियो । लुम्बिनीविरुद्ध पनि कर्णालीका ब्याट्सवुमन निरिह देखिए । लुम्बिनीका लागि ओपनरद्वय लक्ष्मी चौधरी र नेरी थापाले क्रमशः १२ र पाँच रन बनाए ।