बलिउडकी प्रियंका चोपडा भन्दा नेपालकी जसिता सुन्दर !

काठमाडौं : नेपाली अभिनेत्री जसिता गुरुङ सन् २०२० का १ सय सुन्दर अनुहारको लिस्टमा सामेल भएकी छिन् । टिसी क्यान्डरले वर्षेनी प्रकाशित गर्दै आएको सूचीमा यो साल नेपालबाट जसिताले प्रवेश पाएकी हुन् । दुई दिन अघि सामाजिक सञ्जालमा जारी सूचीमा जसिताले ५४ औं स्थान हात पारेकी छिन् । 

सार्वजनिक सूचीमा इजरायली मोडल येल सेल्बियाले पहिलो स्थान हात पारेकी छिन् । यो क्रममा उनले इजरायलकै सबैभन्दा ठूलो सिनेमा हस्ती गल गडोटलाई पनि उछिनेकी हुन् । ‘वन्डर वुमन’ सिरिजकी अभिनेत्री गल गडोड यो वर्षका सुन्दर अनुहारको सूचीमा २१ औं स्थानमा छिन् । नेपाली अभिनेत्री जसिताले यो लिस्टमा पहिलो पल्ट प्रवेश पाएकी हुन् । यो क्रममा उनले बलिउड अभिनेत्री प्रियंका चोपडालाई पनि पछि पारेकी छिन् । यही सूचीमा प्रियंका ९१ औं स्थानमा छिन् ।  टिसी क्यान्डरले उनलाई मोडल तथा अभिनेत्रीको रुपमा सूचीमा सामेल गरेको जनाएको छ । 

टिसी क्यान्डरले सूची सार्वजनिक गरेको भिडियोमा १ सय भित्र अटाएका अनुहारहरू सुन्दरता वा सेक्सी शरीर भएका कारण सूचीमा अटाएको नभइ दुनियाँलाई जानकारी दिने उद्देश्यले मात्र जारी गरेको बताएका छन् । तर, १ सय अनुहार छान्नलाई धेरैवटा विधि प्रयोग भएको दाबी गरेको छ । उसले १ लाख २५ हजार सेलिब्रेटीबाट सयजनाको सूची निकालेको पनि जानकारी गराएको छ । टिसीले जारी गर्दै आएको सूचीको यो ३१ औं संस्करण हो । लन्डनमा बसोबास गर्दै आएकी जसिताले ‘लिलीबिली’बाट नेपाली फिल्ममा डेब्यु गरेकी थिइन् । त्यसयता ‘लभ स्टेसन’मा अभिनय गरेकी जसिता हाल ‘आइ एम ट्वान्टी वान’को सुटिङ गरिरहेकी छिन् ।