के आज इंगेजमेन्ट गर्दैछन् रणवीर र आलिया ?

मुम्बई : रणवीर कपुर र आलिया भट्टको अफेयरको खबर नयाँ होइन । दुवैले यही साल विवाह गर्न लागेको कुरासमेत सकारेका थिए । अझ केही दिन अघि त रणवीर स्वयंले एउटा अन्तर्वार्तामा कोभिड १९ कारण विवाह हुन नसकेको कुरा स्वीकार गरेका थिए ।

यसपछि आउँदो वर्षको कुनै पनि महिना उनीहरूको विवाह हुन सक्ने अड्कलबाजी गरिएको थियो । तर, यो वर्ष उनीहरूले विवाह चैं होइन इंगेजमेन्ट गर्न लागेको खबर छ । भारतीय मिडियामा आएका बग्रेल्ती समाचारले रणवीर र आलियाले आज जयपुरमा इंगेजमेन्ट गर्न लागेको बताएका छन् ।

दुई दिनअघि रणवीर र आलिया जयपुर उडेका थिए । एयरपोर्टमा अर्का रनवीर र दीपिका पादुकोन पनि देखिएका थिए । सबैको अनुमान थियो, उनीहरू नयाँ वर्ष एकै ठाउँ मनाउन हिडेका होलान् तर बाँकी कलाकारले पनि धमाधम जयपुरको टिकट काट्न थालेपछि उद्देश्य अर्कै रहेको शंका गरिएको हो ।

समाचारहरूमा उल्लेख भए अनुसार यतिबेला जयपुरमा रनवीर र दीपिका मात्र होइन रणवीरका निकट साथी आयान मुखर्जी पनि पुगिसकेका छन् । यसैगरी आलियाको तर्फबाट महेश भट्ट, मुकेश भट्ट, पूजा भट्टसँगै करण जोहर पनि जयपुरलागि हिँडिसकेका छन् । रणवीर र आलियाको अफेयर दुई वर्ष अघि ‘ब्रम्हास्त्र’को सेटबाट सुरु भएको थियो ।