जितपछि पत्रकार सम्मेलनमा किन देखिएनन् रहाने ?

काठमाडौं : अस्ट्रेलियामा मंगलबार भारतीय क्रिकेट टिमले पुनरागमन गर्दा नायक बनेका थिए कार्यवाहक कप्तान अजिन्क्या रहाने । टेस्ट श्रृङखलामा १-० ले पछि परिसकेको भारतलाई, कप्तान विराट कोहलीको अनुपस्थितिमा, घरेलु टिमविरुध्द जिततर्फ डोहोर्‍याएका रहानेलाई नायकका रूपमा चित्रित गरिनु स्वभाविक हो । 

तर खेलपछि आयोजित पत्रकार सम्मलेनमा रहाने उपस्थित भएनन् । प्रख्यात जित दर्ता गर्दा पनि रहानेले प्रेसका अगाडि आफ्ना कुरा राख्‍ने मनसाय किन बनाएनन् ? अहिले अस्ट्रेलिया तथा भारतीय प्रेसमा यस विषयमा चर्चा भइरहेको छ ।
 
आफ्नो करियरकै महत्वपूर्ण सफलता हासिल गरेका रहानेले, पत्रकार सम्मेलनमा प्रशिक्षक रवि शास्त्रीलाई मात्र जान दिए । कप्तान कोहलीका अलावा, इशान्त शर्मा र मोहम्मद शामी जस्ता महत्वपूर्ण बलरसमेतको अनुपस्थिति रहेको भारतीय टिमलाई अस्ट्रेलियाविरुध्द अभुतपूर्व जित दिलाएका रहानेलाई प्रश्‍न गर्न तयार रहेका पत्रकार निराश भए ।

खेलमा एक सय १२ रन बनाएका रहानेलाई सायद धेरै प्रश्‍न सोधिनेवाला थियो । उनको कप्तानी अनि इनिङसका बारेमा । खेलमा अस्ट्रेलियाबाट सिर्जित दबाबका बारेमा । अनि जसप्रित बुमराह र रविचन्द्र आश्‍वीनको उपोयोगका बारेमा । 

क्रिकेट र विश्‍वको अर्को प्रख्यात खेल फुटबलबीचमा महत्वपूर्ण फरक छ । क्रिकेटमा कप्तान नै टिमको मुख्य ‘फेस’ हो भने फुटबलमा प्रशिक्षक । त्यसकारण, क्रिकेटमा कप्तानबाट धेरै कुरा सुन्‍न चाहना राख्नु गलत होइन । जब की फुटबलमा टिमको सम्पूर्ण योजना र जितका कारण बारेमा प्रशिक्षकले राम्रोसँग बोल्न सक्छन् । 

पत्रकार सम्मेलनमा रहाने उपस्थिति नहुनुको एउटै कारण उनको स्वास्थ्य खराब हुनु हुनसक्छ । तर त्यस्तो खबर अहिलेसम्म आएको छैन । सन् २०११-१२ मा भएको अस्टे«लिया भ्रमणका बेलामा भारतले सम्पुर्ण चार खेलमा पराजय भोगेको थियो । त्यसबखत पनि भारतीय कप्तान अनुपस्थित भई त्यसै भ्रमण दौरान डेब्यू गरेका रविचन्द्र आश्‍वीनलाई पत्रकार सम्म्लेनमा पठाइएको थियो । 
भारतीय सञ्‍चारमाध्यमको सहयोगमा