भारतका ओटीटी फिल्म पनि नेपाली हलमा !

काठमाडौँ - अंग्रेजी र हिन्दी फिल्म हरेक शुक्रबार आउनाले नेपाली निर्माता हल नपाउने तनावमा रहन्छन् । वितरकले विदेशी फिल्मको तुलनामा नेपाली फिल्मलाई कम सो दिने गरेको गुनासो सदाकाल गर्दै आएका छन् । यसले नेपाली फिल्म सकेसम्म विदेशी फिल्मसँग जुध्न नपरोस् भन्ने कामना गर्छन् । तर वितरकले भने विदेशी फिल्म ल्याउने दायरा झन् झन् बढाउँदै लगेका छन् । नेपालमा विदेशी फिल्म ल्याउने वितरकले हलमा लाग्ने फिल्म मात्र होइन ओटीटीमा लाग्ने फिल्म पनि नेपाल ल्याउन थालेका छन् ।

भारतका ओटीटीमा रिलिज हुने फिल्म नेपाल ल्याउने शृंखला सुरु भएको थियो, सलमान खानको ‘राधे’बाट । सीमित हलमा रिलिज भएको यो फिल्म भारतको ओटीटीमा मुख्यगरी रिलिज भएको थियो । तर नेपालमा हिन्दी फिल्म वितरण गर्ने कम्पनीले यो फिल्म नेपालका केही च्यानलमा रिलिज गर्यो । विनासेन्सर यो फिल्म ओटीटीमा सार्वजनिक भएपछि थोरैतिना हल्लाखल्ला पनि भएको थियो । मिडियामा समाचार आएपछि बल्ल सञ्चार मन्त्रालयले यो फिल्मलाई सेन्सर गर्न बाध्य बनाएको थियो । 
आउँदो हप्ता यस्तै ओटीटीमा मात्र रिलिज हुन लागेको बलिउड फिल्म नेपालका हलमा पनि रिलिज हुने तरखरमा छ । अक्षयकुमार, धनुष र सारा अली खान अभीनित ‘अतरंगी रे’ आउँदो शुक्रबार डिज्ने प्लस हटस्टारमा रिलिज हुँदैछ । भारतका हलमा नलाग्ने यो फिल्म नेपालका हलमा भने उपलब्ध हुनेछ । 

एक समय भोजपुरीमा नेपाली कलाकारले खेलेका फिल्मलाई नेपालीमा डब गरेर नेपाली फिल्मझैं प्रचार प्रसार गरेर लगाइन्थ्यो । एक त भोजपुरी फिल्म , त्यसमाथि नेपाली डब, दर्शकले नपत्याएपछि वितरकले यस्ता फिल्म ल्याउन छाडे । तर महामारीपछि भारतमा ओटीटी च्याउसरी उम्रिएर फैलिएका छन् र तिनले हलकै व्यापारलाई असर गर्न थालेको टिप्पणी हुने गरेका छन् ।

यता नेपालमा भने वितरकले ओटीटीका फिल्म ल्याएर नेपाली निर्माताको चिन्ता थप बढाएका छन् ।  एक त ओटीटीका फिल्म वितरण गर्न धेरै पैसा पनि तिर्न नपर्ने अर्कोतिर व्यापार पनि उत्तिकै हुने । यसले भोलि नेपाली फिल्मलाई असर गर्छ नै महंगो मूल्य तिरेर ल्याइने विदेशी फिल्मलाई पनि सग्लो छाड्दैन । हलको त जे गरे पनि व्यापार हो तर वितरकले यो पक्ष नसोच्दा भोलि क्षणिक फाइदा टाउको दुखाइ नबन्ला भन्न सकिन्न ।