एमसीसी राष्ट्रघाती हाेइन : प्रधानमन्त्री देउवा

काठमाडाैं - प्रधानमन्त्री शेरबहादुर देउवाले एमसीसी राष्ट्रघाती नभएको बताएका छन् ।

नेकपा माओवादी केन्द्रको ८ औं महाधिवशेनको उद्घाटन समारोहमा बोल्दै कांग्रेस सभापति समेत रहेका देउवाले एमसीसी राष्ट्रघाती भन्नेलाई एकपटक पढ्न सुझाव पनि दिए ।

आफू पनि राष्ट्रवादी भएको भन्दै राष्ट्रघाती काम गर्न आफुलाई आवश्यक नरहेको उनको भनाइ छ ।  उनले एमसीसीलाई अघि बढाउनका लागि छलफल भइरहेको पनि बताए ।

उनले सत्ता गठबन्धन कुनै दलको विरोध गर्नका लागि नभएको जिकिर गरे । देउवाले संसद बचाउँदै यसलाई पहिल्यैकाे अवस्थामा चलाउन गठबन्धन गरिएकाे बताए । उनले अब संसदलाई कसैले भंग गर्न नसक्ने उल्लेख गरे । उनले गठबन्धनलाई चुनावपछि पनि निरन्तरता दिन तयार रहेको बताए ।

देउवाले शान्ति प्रक्रिया र संविधानसभाको चुनावमा प्रचण्डको भूमिका निकै महत्वपूर्ण रहेको बताए । समावेशी समानुपातिक आधार रहेको नेपालको संविधान बनाउनका लागि पनि प्रचण्डको भूमिका रहेको बताए।