‘बजरंगी भाइजान’को सिक्वेल ‘पवनपुत्र भाइजान’

मुम्बई -५६ औँ जन्मदिन मनाइरहेका सलमान खानले केही समयअघि मात्र ‘बजरंगी भाइजान’को सिक्वेल बन्ने र यसको तयारी भइरहेको बताएका थिए । ‘आरआरआर’को प्रेस मिटमा यसको घोषणा गरेका उनले सिक्वेलको कथा ‘आरआरआर’कै निर्देशक एसएस राजामौलीका बुबा केभी विजयेन्द्र प्रसादले लेखिरहेको बताएका थिए । 

सोमबार उनले फिल्मको नाम पनि सार्वजनिक गरेका छन् । जन्मदिनमा सञ्चारकर्मीसँग कुरा गर्दै उनले सिक्वेल ‘पवनपुत्र भाइजान’ नाममा बन्ने जानकारी गराएका छन् । तर यो फिल्ममा उनले एसएस राजामौलीसँग काम गर्ने सम्भावना नरहेको बताएका छन् । सलमान ‘आरआरआर’को प्रमोसनमा हैदराबाद पुगेको देखेपछि केहीले सलमान र राजमौलीले सहकार्य गर्न लागेको हो कि भनी शंका गरेका थिए । 

‘पवनपुत्र भाइजान’को काम तत्काल भने सुरु हुने छैन । सलमानका अनुसार उनले पहिले ‘नो इन्ट्री’को सिक्वेल र ‘कभी इद कभी दिवाली’काम सके पछि मात्र ‘पवनपुत्र भाइजान’को काम सुरु गर्नेछन् । 

तर यो फिल्मको निर्देशन कसले गर्ने भन्ने कुरा चाहिँ निक्र्योल भइसकेको छैन । ‘बजरंगी भाइजान’को निर्देशन गरेका कबीर खानले भने आफूलाई सिक्वेलको विषयमा केही पनि थाहा नपाएको बताएका छन् । उनले फिल्मको न त कथा भेटिएको न पटकथा नै आफूले पाएकाले यो फिल्मको कुरा आफूलाई थाहा नभएको जवाफ दिएका थिए ।