प्रहरी कर्मचारीहरू आफ्नो पेसाप्रति गौरवान्वित हुन आवश्यक : आईजीपी

मोरङ – प्रहरी महानिरीक्षक (आईजीपी) शैलेश थापा क्षेत्रीले आफ्नो पेसाप्रति सबै प्रहरी कर्मचारीहरु गौरवान्वित हुन आवश्यक रहेको बताएका छन् ।जिल्ला प्रहरी कार्यालय मोरङको सोमबार निरीक्षण भ्रमण पश्चात प्रहरी कर्मचारीहरुलाई निर्देशन दिँदै आईजीपी क्षेत्रीले उक्त कुरा बताएका हुन् । निरीक्षण भ्रमणको क्रममा उनले प्रहरी सेवा लिन आएका केही सेवाग्राहीहरुसँग अन्तरक्रिया समेत गरेका थिए।

निर्देशनको क्रममा आईजीपी क्षेत्रीले प्रहरी कर्मचारीहरुको आचार संहिता सम्बन्धी कार्यादेश, २०७७ को अक्षरंस पालना गर्दै नागरिकमैत्री प्रहरीको अवधारणाअनुसार हरेक क्षेत्रका व्यक्तित्वहरु सँग समन्वय गरी नागरिकलाई छिटो छरितो एवं पारदर्शी प्रहरी सेवा उपलब्ध गराउने कार्यमा दत्तचित्त भएर लागि पर्नुपर्नेमा जोड दिए ।

शून्य सहनशिलताको अक्षरंस पालना गर्दै विविध जनचेतनामूलक कार्यक्रमहरु सञ्चालन गरी अनुसन्धान पद्धतिलाई प्रविधिमैत्री बनाउँदै प्रमाण र परिणाममूखी अनुसन्धान पद्धतिबाट आम नागरिकलाई प्रत्याभूत हुने गरी सुरक्षा व्यवस्था मिलाउन पर्ने उल्लेख गर्दै आईजीपी क्षेत्रीले विविध अपराधिक घटनाहरु नियन्त्रणमा बहुआयामिक तरिकाबाट कार्य गर्न निर्देशन दिए । 

आईजीपी क्षेत्रीले फरार अपराधीहरुको खोजतलास र पक्राउ गर्न, पुराना पेण्डिङ अपराधका मुद्दाहरुलाई प्राथमिकतामा राखी फर्छौट गर्न र हिरासत व्यवस्थापन, लागूऔषध ओसारपसार रोकथाम तथा नियन्त्रण गर्न र महिला तथा बालबालिकामाथि हुने हरेक घटनालाई गम्भीरतापूर्वक लिई त्यसतर्फ विशेष ध्यान केन्द्रित गर्न समेत निर्देशन दिए । 

कुनै पनि नागरिकलाई बिना झंझट प्रहरी सेवा प्राप्त गर्ने वातावारण बनाउने, नागरिक सहायता कक्षलाई अझ प्रभावकारी बनाउन, कन्ट्रोलमा खटिने प्रहरी कर्मचारीहरुले नागरिकहरु सँग शिष्ट व्यवहार गर्नु पर्नेमा समेत उनले जाेड दिए ।  कोभिड-१९ को प्रभाव पुन दोहोरीन सक्नेतर्फ विशेष ध्यान दिँदै उक्त महामारीको रोकथाम तथा नियन्त्रणको लागि प्रहरी परिचालन गर्न समेत उनले उपस्थित प्रहरी कर्माचारीहरुलाई निर्देशन दिए ।