महिला पत्रकारलाई सुत्केरी भत्ता

हेटौंडा - प्रेस सेन्टर मकवानपुरले महिला पत्रकारलाई सुत्केरी भत्ता दिन सुरुवात गरेको छ । मकवानपुरकी पत्रकार सुनिता विष्टलाई ५ हजार रुपैयाँ सुत्केरी भत्तासहित न्यानो कपडा प्रदान गरेकाे छ । जिल्लामा क्रियाशिल पत्रकार महिलालाई सुत्केरी भएको अवस्थामा भत्ता प्रदान गर्ने प्रेस सेन्टरको निर्णय अनुसार मंगलबार विष्टलाई रकम प्रदान गरिएको हो । 

सेन्टरकी अध्यक्ष अञ्जली थापाले महिला पत्रकारहरु सुत्केरी अवस्थामा केहि समय काममा फर्कन नसक्ने हुँदा आर्थिक समस्या पर्ने भएकाले थोरै भएपनि सहयोग होस भन्ने उदेश्यले भत्ता उपलब्ध गराएको बताइन् ।

संस्थागतरुपमा निर्णय कार्यान्वयन गर्दा मिडिया हाउसहरुलाई समेत महिला संचारकर्मीप्रतीको उत्तरदायित्व पुरा गर्न दबाब सृजना हुने अध्यक्ष थापाको भनाई छ । सुरुवाती अबस्थामा सानो रकम भएपनि कार्यानवयन गरेको बताउदै सेन्टरले आगामी दिनमा जिल्लामा क्रियाशिल पत्रकार महिलाका लागि प्रभावकारी हुने खालका कार्यक्रमहरु ल्याउने थापाको भनाई छ । पत्रकार विष्टलाई पत्रकार महासंघ मकवानपुर, संचारिका समूह मकवानपुरले पनि पोषणयुक्त खाद्यान्न उपलब्ध गराएको छ ।