अब सेनाको निगरानीमा विप्लव समूह

काठमाडौं : नेपाली सेनाले मुलुकमा कोभिड-१९ को चुनौतीसँगै अन्य सुरक्षा चुनौतीहरू पनि बढ्दो रुपमा रहेको जनाएको छ । ‘पृतनापति समन्वयात्मक’ बैठकमा पृतनापतिहरूले नेत्रविक्रम चन्द (विप्लव) समूहको गतिविधीलाई ध्यानमा दिएर यस्तो धारणा राखेका हुन् । उपत्यका पृतना बाहेक अन्यले चन्दको गतिविधीलाई नियाल्न र निस्तेजको रणनीति तय गर्न आवश्यक रहेको जानकारी दिएको एक सहभागीले बताए ।

मुलुकमा द्वेष फैलाउने, शान्ति सुरक्षामा खलल पुर्‍याउने कुनै पनि व्यक्ति वा समूहलाई नेपाली सेनाले आफ्नो तर्फबाट सरकारको निर्देशन अनुरुप कारबाही गर्नेछ । त्यस्ताको गतिविधीमा निगरानी राखेर निस्तेज गर्नका लागि अन्य सुरक्षा निकायसँग सेनाले सहकार्य गर्ने उल्लेख छ । मुलुकको सार्वभौमिकता, सुरक्षा र अखण्डताको लागि सेना सधै संविधानको परिधिमा रहेर पहरेदारीको भूमिमा हुने पनि स्पष्ट पारिएको छ ।

सुरक्षाको विषयमा नयाँ रणनीति बनाउने, यस्ता समुहलाई निस्तेज पार्ने जस्ता विषयमा छलफल भएको हो । गत भदौमा नै गर्ने भनिएको उक्त समन्वय बैठक तत्कालिन रक्षामन्त्रीसँगको सेनाको सम्वन्धमा आएको चिसोपनाले पछि धकेलिएको थियो । आइतबार आरम्भ भएर मंगलबार अबेर सम्पन्न बैठककै बीच पूर्व रक्षामन्त्रीलाई विदाई समेत जंगी अड्डामा गरिएको थियो ।

रक्षामन्त्रालयको जिम्मेवारी आफैमा राखेका प्रधानमन्त्री केपी शर्मा ओलीले आइतबार उक्त कार्यक्रमको उदघाटन गरेका थिए । प्रधानमन्त्री ओलीले सेनाभित्रै घुसपैठ हुनसक्ने संकेत गरेका थिए । उनले त्यसमा सेनालाई सचेत रहन निर्देशनसमेत दिएका थिए । भर्चुअल माध्यमबाट जंगीअड्डाले सञ्चालन गरेको उक्त बैठकमा सेनाका विभिन्न महानिर्देशनालय, निर्देशनालय, विभाग र कार्यालयबाट आ-आफ्नो विभागको जिम्मेवारी सम्बन्धि विषयहरूको कार्य प्रगतिको समिक्षा भएको थियो ।

सुरक्षाको वर्तमान वस्तुस्थिति र कोभिड-१९ बाट सिर्जित अवस्था तथा त्यसबाट आईपर्ने सक्ने सुरक्षा चुनौतीहरु एवं लिनुपर्ने कार्यनीतिहरु सम्बन्धमा सुझावहरू पनि ब्यक्त भएका थिए । उनीहरूको सुझावलाई समेत ध्यानमा दिएर सेनाले यसलाई अघि बढाउने भएको छ ।

प्रधानसेनापति पूर्णचन्द्र थापाले बैठकको समापन गर्दै भएका प्रस्तुतिकरण र छलफलबाट निस्किएका निचोडहरूले भविष्यको लागि महत्वपुर्ण मार्गदर्शन गर्ने बताएका थिए । नेपाली सेनाको कार्यशैलीमा आएको सकारात्मक परिवर्तनले संगठनलाई पद्धति र प्रणालिमा आधारीत बनाउन थप बल पुर्‍याएको पनि उनले बताए । जाडो मौसमका कारण पनि कोभिड-१९ को महामारी बढ्दै जाने पुर्वानुमान अनुसार सबै पृतनाहरुले सम्बन्धित सरोकारवाला निकायहरूसँगको  निरन्तर समन्वयमा आवश्यक पूर्वतयारी गर्नको लागि निर्देशन दिएका थिए ।