लयमा फर्कदै मारियो गोट्जे

मारियो गोट्जे हाल डच लिगमा छन् । उनी त्यहाँको ठूलो क्लबमध्येको एक पिएसभी आइन्डहोभनका लागि खेलिरहेको खबर धेरैका लागि नयाँ हुनसक्छ । २८ वर्षिय जर्मन ‘एट्याकिङ मिडफिल्डर’आफ्नो करियरलाई पुनर्जागृत गर्न नेदरल्यान्डस् पुगेका हुन् ।

जर्मनीले सन् २०१४ मा विश्वकप जित्दा नायक बनेका गोट्जे बार्यन म्युनिखमा थिए । त्यसबखत २२ वर्ष रहेका गोट्जे बोरुसिया डर्टमन्डमा लगातार दुई पटक बुन्डेसलिगा जितेर बार्यन पुगेका थिए । डर्टमन्डले लिग जित्दा टिमका महत्वपूर्ण सदस्य रहेका गोट्जे त्यसपछिका वर्षहरुमा भने फिक्का देखिए । बार्यनमा एक सय १४ खेलमा ३६ गोल र २४ असिस्टको योगदान गरेका गोट्जे अन्ततः डर्टमन्ड नै फर्किए । डर्टमन्ड फर्किएका उनलाई सर्मथकले स्वागत गरे । तर गोट्जेले त्यहाँ पहिलो चरणको बसाईमा जस्तो जादु देखाउन सकेनन् ।

युरोपियन क्लब फुटबलमा सामान्यतया, प्रतिभाशाली खेलाडी डच लिगबाट ठूला भनिएका क्लबतर्फ लाग्छन् । तर, गोट्जे जस्ता स्थापित स्टार डच लिग जानु आफैमा अचम्मलाग्दो घटना हो । डच लिगबुन्डेसलिगा भन्दा फरक छ । युरोप भन्दा बाहिर प्रख्यात छैन् । तर गोट्जेका लागि डच लिग प्रख्यात नहुनुले केही अर्थ राख्दैन । किनभने उनको ध्यान आफ्नो खेलमा कसरी सुधार ल्याउने भन्‍नेमा मात्र छ ।

बुन्डेसलिगामा हुँदा प्रत्येक साता बलियो लय देखाउनु पर्ने बाध्यतामा रहनुपर्ने गोट्जे हल्यान्डमा खुशी देखिन्छन् । वास्तबमा भन्‍ने हो भने उनी त्यहाँको फुटबलमा रमाइरहेका छन् । त्यसको प्रमाण हो, उनले पिएसभीका लागि जारी सिजनमा गरेको योगदान । उनले आठ लिग खेल खेल्दा तीन गोल गरिसकेका छन् भने र दुई असिस्ट पनि प्रदान गरेका छन् ।

‘जर्मनीमा खेल्दा म धेरै दबाबमा हुन्थे । सोचे जस्तो खेल्न नसक्दा मिडियाको हेडलाईन बन्थे । मेरा बारेमा बाहिर के सोचिन्छभन्‍नेमा मेरो ध्यान जान्थ्यो । सायद म आफैले पनि आफुमाथि दबाब सिर्जना गर्थे,’ गोट्जे भन्छन्, ‘अहिले म फेरिएको छु । अरुले मेरो प्रदर्शनलाई कसरी विश्लेषण गर्छन् भन्दा पनि म आफै आफ्नो खेलबाट कती खुशी छु भन्‍ने महत्वपूर्ण हो भनेर बुझेको छु ।’ 

२००९/१० सिजनबाट बुन्डेसलिगामा डेब्यु गरेका गोट्जेले दोस्रो सिजनमा कमाल गरे । डर्टमन्डका लागि ३३ लिग खेल खेल्दा ६ गोल गरे भने १५ असिस्ट दर्ता गरे । योर्गेन क्लपको नेतृत्वमा लगातार २०११÷१२ मा लगातार दोस्रो पटक लिग जित्दा पनि गोट्जेले आफ्नो बलियो लयलाई कायमै राखे । त्यस सिजन चोटका कारण १७ खेलमा मात्रै मैदानमा रहेका गोट्जेले ११ गोल र असिस्टको योगदान गरे । त्यसपछिका दुई सिजनमा उनले डर्टमन्ड र बार्यनकालागि २० गोल गरे भने २१ असिस्टको योगदान गरे । त्यसपछिका सिजनमा भने गोट्जे उस्तै रहेनन् । चोट र खराब लयका कारण उनले बार्यनमा कम मौका पाउन थाले ।

पिएसभीमा उनी खुशी रहनुको कारण उनले पर्याप्त खेल्ने मौका पाउनु पनि हो । ‘गत सिजन मैले डर्टमन्डमा धेरै खेल्न पाइन । खेल्ने मौका नै नपाए त प्रदर्शनमा सुधार गर्न सकिँदैन । त्यसकारण खराब लयबाट गुज्रिरहेका कोही खेलाडीले खेल्ने मौका नपाए उसको ब्यक्तिगत प्रदर्शन थप खस्किन्छ । यहाँ मैले खेल्न पाइरहेको छु । जुन मेरा लागि महत्वपूर्ण छ,’ गोट्जेले भने ।  

पिएसभीको जर्सीमा सन्तोषजनक खेल देखाइरहेका गोट्जेलाई जर्मनीको राष्ट्रिय टोलीमा मौका पाउने आस मरेको छैन । पछिल्लो समय जर्मन टिममा नयाँ अनुहारहरुलाई मौका दिइरहेका प्रशिक्षक योकिम लो ओलोचित भइरहेका छन् । युवा प्रतिभाहरुले भरिएको नयाँ जर्मन टिमले निरन्तर खराब नतिजा दिइरहेकाले लोको पद नै धरापमा छ । यस्तोमा गोट्जे जस्ता अनुभवी खेलाडीले मौका पाउने सम्भावना कती छ ? त्यसको उत्तर गोट्जेसँग पनि छैन ।

विश्वकप जित्दा महत्वपूर्ण साबित भएका धेरै खेलाडीलाई लोले विदा गरिसकेका छन् । ‘म प्रशिक्षक लोसँग सम्पर्कमा नै छु । म १८ वर्षको हँुदादेखि नै मेरो उनीसँग सम्बन्ध रहि आएको छ । तर त्यसकै भरमा मैले जर्मन टिममा मौका पाउने भन्ने हुँदैन । तर यदिमौका पाए म आफ्नो मुलुकलाई निराश बनाउँदिन,’ गोट्जेले भने ।