नेकपालाई अब विभाजनबाट रोक्‍न सकिन्‍न : पौडेल

फाइल तस्बिर

काठमाडौँ : नेकपा ओली समूहका महासचिव एवं अर्थमन्त्री विष्णु पौडेलले पार्टीलाई अब विभाजनबाट जोगाउन सम्भव नभएको बताएका छन् । शनिबार नेकपा बागमती प्रदेश सम्पर्क समितिले आयोजना गरेको कार्यकर्ता भेलामा उनले पुष्पकमल दाहाल र माधवकुमार नेपाल नै पार्टी विभाजन गर्न लागि परेकाले अब पार्टीलाई विभाजनबाट जोगाउन सम्भव नभएको बताए । 

पौडेलले संविधानअनुसार लोकतन्त्रमा प्रधानमन्त्रीले मध्यावधि चुनावमा जान गरेको निर्णय उचित भएकाले अब कसैले पनि रोक्न नसक्ने बताए । आफ्नै पार्टीको घेराबन्दी र असहयोगका कारण प्रतिनिधि सभा विघटन गर्नुपरेको उनको दाबी छ ।

सरकारको लोकप्रिय काम पार्टीकै नेताहरूलाई अपच भएपछि जनतामा जाने गरी प्रतिनिधि सभा विघटन भएको पौडेलले बताए । नेकपाका अर्का अध्यक्ष दाहालले पार्टीको सचिवालय बैठकमा पेस गरेका आरोपपत्र नै पार्टी विभाजनको मुख्य कारण रहेको आरोप पनि लगाए । दाहालले आफू प्रधानमन्त्री बन्‍नकै लागि ओलीलाई हटाउन खोजेको उनको भनाइ छ ।