नागरिकता बनाउन गएका सेवाग्राहीको लडेर मृत्यु

विराटनगर-  नागरिकता बनाउनका लागि जिल्ला प्रशासन कार्यालय सोलुखुम्बु पुगेका एक सेवाग्राहीको मुत्यु भएको छ । सोलुदुधकुण्ड नगरपालिका–८ केरुङका ६६ बर्षीय फुर्वा शेर्पाको बुधबार दिउँसो मृत्यु भएको जनाइएको छ ।

नागरिकता बनाउन पुगेका शेर्पा प्रशासन कार्यालयमै लडेपछि बेहोस भएका थिए । उनलाई तत्काल उद्धार गरि जिल्ला अस्पताल फाप्लु पुर्‍याउने क्रममा मृत्यु भएको सोलुखुम्बुका सहायक प्रमुख जिल्ला अधिकारी लक्ष्मी भट्टराईले जानकारी दिए ।

शेर्पा नशासम्बन्धी समस्याका कारण बिरामी थिए । फाप्लु अस्पतालमा भर्ना भएर उपचार गराइरहेका उनलाई आफन्तले नागरिकता बनाउन भन्दै जिल्ला प्रशासन पुर्‍याएको जनाइएको छ ।

बिरामी अवस्थामै अस्पतालबाट लगिएका कारण उनको मृत्यु भएको अस्पताल प्रशासनले जनाएको छ । उनी लामो समयदेखि परिवारको सम्पर्कबाट एक्लै रहेर नागरिकता समेत नलिई बसेका थिए ।