सत्ता गठबन्धन समन्वय समितिको बैठक सकियो, संसद सञ्चालनका लागि पहल गर्ने

काठमाडौँ– सत्ता गठबन्धन समन्वय समितिको बैठक सम्पन्न भएको छ । बिहीबारकै बैठककको निरन्तरता रूपमा बसेको बैठकले संसद्को गतिरोध फुकाउन पहल गर्ने गरी बैठक सकिएको बताइएको छ । 

‘संसद अवरुद्ध भएकोले महत्वपूर्ण विधेयकहरू रोकिएका छन् । मुलुक राम्रोसँग सञ्चालन हुन कार्यपालिका, न्यायपालिका र व्यवस्थापिका राम्ररी सञ्चालन हुनुपर्छ,’ बैठकमा सहभागी सञ्चार तथा सूचना प्रविधि मन्त्री ज्ञानेन्द्रबहादुर कार्कीले भने, ‘संसदमा जारी गतिरोध अन्त्य गर्न सरकारको जत्तिकै प्रतिपक्षीको पनि भूमिका हुन्छ ।’ 
मन्त्री कार्कीले त्यसका लागि पहल गर्ने र प्रतिपक्षसँग संवाद गर्ने बताए । संसदमा जारी अवरोध फुकाउन सरकारका प्रवक्ता कार्कीले प्रधानमन्त्रीको दूतका रूपमा प्रमुख प्रतिपक्षी दलको नेताका रूपमा पटक–पटक छलफल गरिसकेका छन् । 

त्यस्तै, सत्ता गठबन्धन समन्वय समितिका संयोजक रामचन्द्र पौडेलले पनि भर्खरै प्रतिपक्षी नेता ओलीसँग भेटेर मुलुकलाई ठप्प राख्न नहुने बताएका थिए । प्रधानमन्त्री देउवाले पनि ओलीलाई भेटेर संसदको गतिरोध फुकाउन पहल गर्ने बताइएको छ ।