विकेन्डसँगको अफेयरमा एन्जेलिना जोली

लसएन्जल्स - अभिनेत्री एन्जोलिना जोली र गायक दि विकेन्डले बेन एफलेक र जेनिफर लोपेजको पदचाप पछयाएको समाचार आएका छन् । जोली र दि विकेन्ड  अफेयरमा रहेको खबर सार्वजनिक भएसँगै धेरैले यो जोडीलाई पनि बेन र जेनिफरसँग तुलना गरेका हुन् । जोली र दि विकेन्डको रोमान्सको इतिहास पुरानो नभए पनि बेनिफरको भन्दा कम रोचक नरहेको टिप्पणी हुन थालेको छ ।

जोली र दि विकेन्डले आफूहरू अफेयरमा रहेको कुरा सार्वजनिक रुपमा स्वीकार गरेका छैनन् तर उनीहरूले पापाराजीलाई पन्छाउने पनि गरेका छैनन् । पापाराजीले थुप्रै अवसरमा दुवैलाई सँगै कैद गरेका छन् । ब्राड पिटसँग अलग भएपछि जोली पहिलोपल्ट दि विकेन्डसँग सार्वजनिक स्थानमा देखिन थालेकी हुन् ।

उनलाई नयाँ वर्षमा पनि गायकसँगै इटालियन रेष्टुरेन्टमा पापाराजीले भेटेका थिए । एबेल टेस्फय असली नाम भएका विकेन्डको नाम जोलीसँग जोडिनुअघि चर्चित मोडल बेला हाडिडसँग जोडिने गरेको थियो । सन् २०१९ मा जोलीको झैँ उनको पनि छुट्टानाम भएको थियो । 

जोली र विकेन्डको अफेयरको खबरलाई विकेन्डको भर्खरै सार्वजनिक एल्बम ‘डनएफएम’ले पनि पुष्टि गरेको धेरैको टिप्पणी छ । ‘हियर वि गो’ बोलको गीतमा विकेन्डले मेरो नयाँ केटी मुभी स्टार रहेको आशयको गीत गाएका छन् । यो गीत सार्वजनिक भएसँगै दुवैका फ्यानले अफेयरमा रहेको आशंका गरेका थिए ।