दाहालले १० वटा सरकार गिराइसके : लेखराज भट्ट

धनगढी : केपी शर्मा ओली नेतृत्वको नेकपाका सुदूरपश्चिम संयोजक तथा उद्योग, वाणिज्य तथा आपूर्तिमन्त्री लेखराज भट्टले पुष्पकमल दाहालले १० वटा सरकार गिराइसकेको प्रतिक्रिया दिएका छन् । सुदूरपश्चिमको अस्थायी राजधानी धनगढीमा आयोजित पत्रकार सम्मेलनमा मन्त्री भट्टले यस्तो बताएका हुन् ।

‘अध्यक्ष कमरेडले १० वटा सरकार गिराइसक्नु भएको रेकर्ड छ । पार्टी त नेकपासम्म उहाँले विघटन गराउनुभयो । यो प्रवृत्तिविरुध्‍द हामी जनताको बीचमा गइरहेका छौं,' उनले भने 'बैशाखमा निर्वाचन हुने भएकाले नेकपा त्यसको तयारीमा जुटिसकेका छौं ।'

उनले तत्कालै प्रदेश सरकार फेरबदलको कसरतमा आफ्नो पक्ष नलागेको उनले बताए । ‘संस्थापन पक्ष छ, यसले कसैलाई बदलिहाल्ने र कसैसँग गठबन्धन गरिहाल्नेबारे सोचेको छैन्,’ उनले भने, ‘उहाँहरुले के गर्नुहुन्छ र कस्ता क्रियाकलाप गर्नुहुन्‍छ । त्यसलाई गम्भिरतापूर्वक संघीय सरकार र पार्टी नेतृत्वले हेरिरहेका छौं । छिट्टै स्थायी समितिको बैठक बस्छ । त्यसले कस्तो कदम चाल्नेबारे निर्णय गर्छ ।’

उनले मुख्यमन्त्री त्रिलोचन भट्टले भौतिक पूर्वाधार विकास मन्त्री पठानसिंह बोहरालाई बर्खास्त गरेर राजनीतिक संस्कार विपरीत काम गरेको बताए ।