‘भूलभूलैया २’मा विद्या बालनको प्रवेश

मुम्बई - ‘भूलभूलैया २’मा विद्या बालन पनि रहने भएकी छिन् । निर्देशक अनिश बज्मीले मिडडेसँग कुरा गर्दै फिल्ममा विद्याको पनि भूमिका रहेको बताएका छन् । 
सन् २०११मा प्रदर्शन भएको ‘भूलभूलैया’ विद्याले राजकीय भूतको रुपमा दमदार भूमिका निर्वाह गरेकी थिइन् ।

‘आमी जे तोमार’ बोलको गीत गाउँदै मन्जुलिकाको रुपमा तर्साउने उनको भूमिकालाई दर्शकले अत्यधिक रुचाएका थिए । दोस्रो भाग बन्ने खबर आएर कलाकारको नाम सार्वजनिक हुँदा यो सूचीमा विद्या थिइनन् । फिल्ममा कार्तिक आर्यन, कियरा आडवानी र तब्बुको भूमिका रहने बताइएको थियो ।

निर्देशन अनिश बज्मीले मन्जुलिकाको चरित्र आफूलाई मनपर्ने चरित्र भएकाले फिल्ममा त्यो समावेश रहने बताएका छन् । ‘यदि भूलभूलैया छ भने त्यहाँ मन्जुलिका हुन्छिन् नै,’ अनिश बज्मीलाई उद्धृत गर्दै पत्रिकाले लेखेको छ । 

सन् २००५ मा ‘परिनीता’बाट डेब्यु गरेकी विद्या बालन विना हिरो पनि फिल्म हाँक्ने सक्ने अभिनेत्री मानिन्छिन् । उनले मात्र लिड गरेका थुप्रै फिल्मले पैसा र प्रशंसकसँगै पाएका प्रशस्त उदाहरण छन् ।