‘चन्डीगढ करे आशिकी’बन्यो २४ घन्टामा सबैभन्दा बढी हेरिने फिल्म

मुम्बई -हलमा रिलिज भएर औसत व्यापार गरेको फिल्म ‘चन्डीगढ करे आशिकी’ले स्ट्रिमिङमा भने पर्याप्त दर्शक पाएको छ । गत शुक्रबार नेटफ्लिक्समा रिलिज भएको यो फिल्म २४ घन्टा सर्वाधिक हेरिने फिल्मको रुपमा सूचीकृत भएको थियो । 

फिल्मले रेकर्ड कायम गरेपछि यसका मुख्य अभिनेता आयुष्मान खुरानाले लैंगिक समावेशिताको मुद्दा धेरैसम्म पुगेको बताएका छन् । ‘हामी लैगिक समावेशिताको मुद्दा धेरैभन्दा धेरैसम्म पुगोस् भन्ने चाहान्थ्यौँ । यति धेरै मानिसले यो फिल्म पुरै हेर्नुभयो, यसले हाम्रो चाहना पूरा भएको छ,’आयुष्मानले भनेका छन् । 

अभिषेक कपुरले निर्देशन गरेको यो फिल्मले ट्रान्स जेन्डरको मुद्दालाई उठाएको छ । फिल्ममा आयुष्मान खुराना र वाणी कपुरको जोडी देख्न सकिन्छ । 
हलमा महिना दिन अघि सार्वजनिक भएको फिल्मले औसत व्यापार गरे पनि हेर्ने दर्शकबाट धाप पाएको थियो । यो फिल्मबाट आयुष्मानभन्दा पनि वाणी कपुरको कामको तारिफ भएको थियो ।