नयाँ रेकर्ड बनाएपछि स्थिर हुने प्रयासमा सेयर बजार

काठमाडौंः नेपाल स्टक एक्स्चेन्ज (नेप्से) परिसूचक आज सामान्य ओरालो लागेको छ । मंगलबार नेप्से ३.५४ अंकले घटेर २,१६५.४९ बिन्दूमा रोकिएको छ । आइतबार नेप्सेले अहिलेसम्मकै उच्च रेकर्ड बनाउँदै २,१७५.३९ अंकमा पुगेको थियो । यसअघि बिहीबार नेप्से परिसूचकले मंसीर १७ को रेकर्ड तोडेको थियो । यसअघि मंसीर १७ मा नेप्से उच्च बिन्दूमा पुगेपछि त्यसको एक महिनापछि पुस १६ मा मात्र नेप्सेले नयाँ रेकर्ड बनाएको देखिन्छ । आइतबारको उच्च बिन्दू २,१७५.३९ अंकको थ्रेसहोल्डमा भने नेप्से लामो समय अडिने देखिदैंन । मंसीर १७ को रेकर्डपछि नयाँ रेकर्ड बनाउन करिब एक महिना लागेपनि त्यो क्रम अब छिटो हुनसक्ने सेयर बजार विश्लेषकहरूले बताएका छन् । 

मंगलबार नेप्सेमा जलविद्युत् समूहको परिसूचक ३.१२ अंकले बढेको छ । त्यस्तै, निर्जीवन बीमा कम्पनी र विकास बैंक समूहको परिसूचक पनि बढेको छ । अन्य समूहका परिसूचक भने ओरालो लागेको छ । नेप्सेले नयाँ रेकर्ड बनाएपछि यसमै पनि लाभ लिन सेयर किन्ने भन्दा पनि बिक्री गर्ने धेरै भएपछि मंगलबार बजार सामान्य घटेको छ । यद्यपि बजार सामान्य मात्र घट्नुले बजारमा लगानी गर्नेहरूको आकर्षण पनि कायमै देखिन्छ । 
जनउत्थान सामुदायिक लघुवित्त, नारायणी विकास बैंक, हिमाल दोलखा हाइड्रोपावर कम्पनी, रिडी हाइड्रोपावर डेभलपमेन्ट कम्पनी र जोशी हाइड्रो लगायतको सेयर मूल्य बढेको छ । 

यो साता लगातार बढीरहेको साल्ट ट्रेडिङ कम्पनीको सेयर मूल्य ६ प्रतिशतले, हिमालयन डिस्टिलरीको ३.५ प्रतिशत, राष्ट्रिय बीमा कम्पनी लिमिटेड (प्रबद्र्धक सेयर), विशाल बजार कम्पनी तथा नेशनल माइक्रोफाइनान्स वित्तिय संस्था लगायतको सेयर मूल्य साढे दुई प्रतिशतभन्दा बढीले घटेको छ । 

मंगलबार नेप्सेमा २०६ कम्पनीको ४ अर्ब ५६ करोड ६४ लाख रुपैयाँ मूल्य बराबरका एक करोड आठ लाख नौ हजार ६ सय २५ कित्ता सेयर ४२ हजार पाँच सय १४ ओटा कारोबारमार्फत किनबेच भएको छ । कुल बजार पुँजीकरण २९ खर्ब १६ अर्ब ८० करोड रुपैयाँ पुगेको छ । 

मिति	नेप्से परिसूचक	कारोबार
पुस १, बुधबार	२०५५.२२	५ अर्ब १४ करोड
पुस २, बिहीबार	२०३२.५१	६ अर्ब ७६ करोड
पुस ५, आइतबार	१९३५.६३	९ अर्ब ४ करोड
पुस ६, सोमबार	१९६५.९६	६ अर्ब ६९ करोड
पुस ७, मंगलबार	२०६१.४१	६ अर्ब ७४ करोड
पुस ८, बुधबार	२०६८.५६	६ अर्ब ८६ करोड
पुस ९, बिहीवार	२०३८.६३	५ अर्ब ३६ करोड
पुस १२, आइतबार	१९९८.६५	४ अर्ब ५९ करोड
पुस १३, सोमबार	२०१२.८९	४ अर्ब ९ करोड
पुस १४, मंगलबार	२००७.२९	३ अर्ब ८५ करोड
पुस १५, बुधबार	२,०६२.०६	४ अर्ब ४५ करोड
पुस १६, बिहीबार	२,०८७.२७	५ अर्ब ७० करोड
पुस १९, आइतबार	२,१७५.३९	६ अर्ब ३४ करोड
पुस २०, सोमबार	२,१६९.०४	५ अर्ब ९६ करोड
पुस २२, मंगलबार	२,१६५.४९	४ अर्ब ५६ करोड