गण्डकी प्रदेशसभाका नेकपा सांसदहरुले पनि दसैं भत्ता फिर्ता गर्ने

पोखरा : गण्डकी प्रदेशसभाका नेकपा सांसदहरुले दसैं भत्ता फिर्ता गर्ने भएका छन् । नेकपा संसदीय दलका नेता मुख्यमन्त्री पृथ्वीसुब्बा गुरुङले दलका प्रमुख सचेतक मायानाथ अधिकारीलाई सांसदहरुको भत्ता फिर्ता गराउन निर्देशन दिएका थिए । 

गुरुङको निर्देशन बमोजिम नेकपा सांसदले दसैं भत्ता फिर्ता गर्ने भएका हुन् । मुख्यमन्त्री गुरुङले भत्ता फिर्ता गर्ने निर्णय भएको जानकारी दिए । ‘मन्त्रीपरिषद्ले मुख्यमन्त्री, मन्त्रीको भत्ता फिर्ता गर्ने निर्णय गरेको थियो, पार्टीले समेत फिर्ता गर्ने निर्णय भएको छ,’ मुख्यमन्त्री गुरुङले भने । संसदमा नेकपाका ४० सांसद रहेका छन् ।

गण्डकीका कांग्रेस र जनमोर्चाका सांसदले समेत दसैं भत्ता फिर्ता गर्ने निर्णय गरिसकेका छन् । सांसदले पाउने मासिक पारिश्रमिक ५२ हजार रुपैयाँ, दलका सचेतकले ५४ हजार २ सय, प्रमुख सचेतकले पारिश्रमिक स्वरुप पाउने ५६ हजार ८ सय ४० रुपैयाँ फिर्ता गर्ने निर्णय गरेका थिए । 

यसअघि गण्डकी प्रदेशका मुख्यमन्त्री र मन्त्रीहरुको दसैं भत्ता कोरोना कोषमा जम्मा गर्ने निर्णय भएको थियो । बुधबार बिहान बसेको प्रदेश मन्त्रिपरिषद्को बैठकले मुख्यमन्त्री तथा मन्त्रीको दसैं भत्ता कोरोना कोषमा जम्मा गर्ने निर्णय गरेको थियो । 

गण्डकी सरकारका प्रवक्तासमेत रहेका भौतिक पूर्वाधार विकास मन्त्री रामशरण बस्नेतले दसैं भत्ता कोरोना कोषमा जम्मा गर्ने निर्णय भएको जानकारी दिए । उनले कोरोना संक्रमण बढिरहेकाले सुरक्षित भएर चाडपर्व मनाउन आग्रह गरेका छन् । 

दसैं भत्तामा १ महिनाको तलब बराबर मुख्यमन्त्री, मन्त्री तथा सांसदले पाउने रकम कोरोना कोषमा जम्मा हुने भएको हो । गण्डकी प्रदेशमा मुख्यमन्त्रीको मासिक पारिश्रमिक ७० हजार र मन्त्रीहरुको ६० हजार रुपैयाँ छ ।