प्रदेशको बजेट दुर्घटनातर्फ अघि बढेको रहेछ : मुख्यमन्त्री राई

विराटनगर : प्रदेश १ का मुख्यमन्त्री शेरधन राईले आर्थिक मामिला तथा योजना मन्त्री इन्द्रबहादुर आङबोका कारण प्रदेशको बजेट दुर्घटनातर्फ अघि बढेको आरोप लगाएका छन् । ‘प्रदेशको बजेट दुर्घटनातर्फ अघि बढेको रहेछ,’ मुख्यमन्त्री राईले भने, ‘समस्या पहिचान भएकाले उपचारको प्रकृया सुरु भइसकेको छ । मन्त्रालयका सचिवले चिकित्सकको भूमिका निर्वाह गर्नुपर्छ ।’ क्रोनिक एकै पटक देखा नपरेको मुख्यमन्त्री राईको भनाइ थियो ।

आफूविरुद्ध नै अविश्वासको प्रस्ताव दर्ता गराउन प्रमुख भुमिका खेलेको भन्दै प्रदेश १ का मुख्यमन्त्री शेरधन राईले १२ दिनअघि प्रदेशका आर्थिक मामिला तथा योजना मन्त्री आङबोलाई बरखास्त गरेर उक्त मन्त्रालय आफ्नै मातहतमा राखेका थिए । आफैले जिम्मेवारी लिएको मन्त्रालयमा १२ दिनपछि मन्त्रालयका कर्मचारीसंगको छलफलमा यस्तो आरोप लगाएका हुन् । 
  
‘संघीयताको मुटु प्रदेश भएजस्तै प्रदेश सरकारको मुटु आर्थिक मामिला तथा योजना मन्त्रालय हो,’ उनले भने, ‘प्रदेश सरकारको मुटु पहिलो वर्ष राम्रै चले पनि दोश्रो वर्षको अन्त्यदेखि समस्या देखियो । आर्थिक मामिला मन्त्रालय कसका कारण यो अवस्थामा आइपुग्यो भन्ने सबैै रिपोर्टिङ मलाइ छ,’ मुख्यमन्त्री राईले भने, ‘प्रदेश सरकारले सही र यथार्र्थपरक बजेट बनाउन नसकेको र वित्तिय अनुशासन कायम नभएकोबारे विभागीय मन्त्रीलाई पटक–पटक सचेत गराएकै हो, तर हुन सकेन ।’ मन्त्रालयमा देखिएको वेथितिलाई पूर्णरुपमा निर्मुल गर्न मुख्यमन्त्रीले निर्देशन दिए । प्रणालीको विकास हुन नसक्दा मुलुकको दिगो र व्यवस्थित विकास हुन नसकेको उनको भनाइ थियो । 

पछिल्लो राजनीतिक घटनाक्रमले केही अन्यौल देखिए पनि अन्यौलता चिरेर काम गर्न कर्मचारीहरुलाई उनले आग्रह गरे । ‘प्रदेशमा जसरी घटनाक्रमअघि बढेको छ, यसको भ्रममा नपर्नुहोला,’ उनले भने, ‘ आगामी माघ ७ गतेको प्रदेशसभापछि अन्यौलता हट्ने  छ ।’ माघ ७ गते प्रदेश सभाको बैठक बोलाइएको छ । त्यही प्रदेश सभा बैठकमा मुख्यमन्त्रीले आफूविरुद्धको अविश्वासको प्रस्तावको सामना गर्दैछन् । सरकार परिवर्तन हुने हल्लापछि लाग्नुपर्ने अवस्था नभएको उनको भनाइ थियो । ‘मेरै नेतृत्वको सरकारअघि बढ्छ,’ उनले भने, ‘कोही, कतै र कसैबाट पनि प्रभावित नहुनुहोला ।’