ओजिलको भविष्य चाँडै टुङ्गो लाग्छ : फेनेरबाचे प्रशिक्षक बुलुट

काठमाडौं : टर्कीस क्लब फेनेरबाचेका प्रशिक्षक इरोल बुलुटले मेसुट ओजिल टर्की आउने वा नआउने भन्‍ने विषय चाँडै प्रस्ट हुने बताएका छन् । विगत केही दिन देखि आर्सनल मिडफिल्डर फेनेरबाचे जाने हल्ला चलिरहेको छ । त्यसै परिपेक्ष्यमा बुलुटको भनाई आएको हो । 

‘मेसुट फेनेरबाचेका खेलाडी होइनन् । त्यसकारण अहिले उनको विषयमा धेरै टिप्पणी गरिरहनु उचित हुँदैन । तर यती चाँहि भन्‍न सकिन्छ, उनी टर्की आउने नआउने केही दिन मै थाहा हुन्छ,’ बुलुटले भने ।  त्यसो त जर्मन टेलिभिजन च्यानल स्पोर्ट वानले ओजिलले टर्कीस क्लबका अधिकारीहररूसँग कुरा गरिसकेको र साढे तीन वर्षका लागि सम्झौता गर्न तयार रहेको खबर सम्प्रेषण गरेको थियो । 

३२ वर्षिय जर्मन मिडफिल्डर अमेरिका तथा कतारका क्लबहररूसँग पनि जोँडिदै आएका छन् । रियल म्याड्रिडबाट सन् २०१३ मा आर्सनल आएका ओजिलले लन्डन क्लबका लागि पछिल्लो समय कुनै पनि खेल खेलेका छैनन् । जारी सिजनको अन्त्यमा फ्रि–एजेन्ट बन्‍ने ओजिललाई जनवरीको सरुवा बजारमा कती रकम हालेर अनुबन्ध गरिने हो भन्ने बारेमा फेनेरबाचेले केही बताएको छैन् । 

उता आर्सनल प्रशिक्षक मिकेल आर्टेटाले ओजिलका लागि यस महिना चिक्तबुझ्दो प्रस्ताव नआए विश्वकप विजेता उत्तरी लन्डनमै रहने बताएका छन् । ‘यदि ओजिलका लागि चिक्तबुझ्दो प्रस्ताव आए त्यो उनको र क्लबका लाागि खुशीको कुरा हुनेछ । नभए, उनी सम्झौता रहुन्जेल आर्सनलमै बस्‍नेछन् ।’ आर्टेटाले बिहीबार पत्रकारहररूसँग कुरा गर्दै भने ।