आहा रारा गोल्डकप : आर्मीलाई हराउँदै मनाङ फाइनलमा

काठमाडौँ -  पोखरामा जारी आहा रारा गोल्डकपको उपाधिका लागि मनाङ मर्स्याङ्दी र एपीएफ क्लब भिड्ने भएका छन् । आज बिहीबार भएको दोस्रो सेमिफाइनलमा मनाङले विभागीय टिम त्रिभुवन आर्मी फुटबल क्लबलाई टाइब्रेकरमा ४-३ गोल अन्तरले गोलले हराएर फाइनल प्रवेश पक्का गरेको हो । 

खेलको पहिलो हाफमा मनाङका विमल रानाले पेनाल्टी खेर फाल्दा उसले खेलमा अग्रता बनाउने मौका खेर फालेको थियो । 

१० औं मिनेटमा एडिलाजा सोमिडेले क्रस गरेको बलमा आर्मीका युद्ध शाहीले बल क्लियर गर्न खोज्दा हातले बल छोएपछि मनाङले पेनाल्टी पाएको थियो । तर सो पेनाल्टीलाई विमल रानाले सदुपयोग गर्न सकेनन् । उनको प्रहार पोष्टको माथिबाट बाहिरीयो ।  निर्धारित ९० मिनेट गोलररहित बराबरी भएपछि खेल अतिरिक्त समयमा धकेलिएको थियो । अतिरिक्त ३० मिनेटको समयमा दुवै समूहले गोल गर्न नसकेपछि खेल ट्राइब्रेकरमा पुगेको थियो ।  जसमा आर्मीले ३ गोल गर्दा मनाङले ४ गोल गर्न सफल भयो । मनाङका गोलक‍िप्परले आर्मीको प्रहार बचाउँदै टीमको जित पक्का गरे । उनी आज म्यान अफ दी म्याच पनि भए । 

अब ६ पटकको च्याम्पियन मनाङले शनिबार उपाधिका लागि एपीएफसँग भिड्ने छ । एपीएफ मच्छिन्द्रलाई ३-१ गोलले हराउँदै फाइनलमा पुगेको हो । प्रतियोगिताको विजेताले १० लाख एक हजार र उपविजेताले पाँच लाख एक हजार रुपैयाँ पाउनेछ ।