प्रधानमन्त्री ओली 'श्री ७' महाराज जस्ता  : डा. केसी

फाइल तस्बिर

काठमाडौँ : चिकित्सक क्षेत्र सुधारका अभियन्ता डा. गोविन्द केसीले प्रतिनिधि सभा विघटन गरेर निरंकुशता लादेको सरकार नचाहिने बताएका छन् । प्रतिनिधि सभा विघटनविरुद्धमा नागरिक अगुवाहरूले शनिबार काठमाडौंमा आयोजना गरेको विरोध प्रदर्शनमा डा केसीले जनताको संघर्षबाट ल्याएको संविधानको रक्षा गर्नु मतदाताको कर्तव्य भएको बताए । 

उनले संविधानले नदिएको अधिकार प्रयोग गरी प्रतिनिध सभा विघटन गर्ने प्रधानमन्त्री केपी शर्मा ओलीको शैली 'श्री ७' महाराजको जस्तो भएको टिप्पणी गरे । 

डा केसीले प्रधानमन्त्री, राष्ट्रपति, मन्त्री कोही पनि नभइ संविधान सर्वोपरी भएकाले त्यसको पालना नभए जनता सडकमा आउनुपर्ने बताए ।  

प्रतिनिधि सभा विघटनको मुद्दा सर्वोच्चमा रहेको र त्यहाँबाट ओलीको कदमलाई रोक्ने आश रहेको डा. केसीले बताए । 

कार्यक्रममा नागरिक अगुवाहरूले प्रधानमन्त्री ओलीको कदम असंवैधानिक भएको भन्दै नागरिक सचेत हुनुपर्ने बेला आएको धारणा बताए ।