लिभरपुललाई अप्रत्याशित टिम बनाउने साडियो माने

काठमाडौं : लिभरपुलविरुध्‍द उत्रन कुनै पनि टिम सहज मान्दैनन् । योर्गेन क्लपको टिम प्राविधिक रुपमा उच्च स्तरको त छँदैछ, शारीरिक हिसाबमा पनि बलियो छ । अनि एनफिल्डमा लिभरपुल सर्मथकहरूको गर्जनको त ब्याख्या नै गर्नुपरेन । सायदै कुनै टिम लिभरपुलसँग खेल्न उत्साहित हुन्‍छन् ।

लिभरपलसँग खेल्नु अघि विपक्षि टिमका प्रशिक्षकले कसरी तयारी गर्लान् ? के रणनीति बनाउलान् ? अनि लिभरपुल स्टारहरूलाई रोक्न बनाएको योजना कार्यान्वयन गर्न आफ्ना खेलाडीहरूलाई कसरी सम्झाउलान् ? सायद उनले भन्लान्, मोहम्मद सलाहलाई कुनै पनि हालतमा ‘लेफ्ट सट’ हान्‍न नदिनु । रोर्बटो फिरमिन्होलाई ‘मार्क’ गर्नु । तर लिभरपुलसँग सलाह र फिरमिन्हो बाहेक अर्का बलियो खेलाडी पनि त छन् । सेनेगलका साडियो माने । उनलाई चाँही कसरी रोक्ने ? उनलाई रोक्न आफ्ना खेलाडीहरुलाई के भनेर निर्देशन दिने ?

मानेले गरेका गोलका ‘हाईलाइट्स’ हेरेर योजना बनाउछु भन्‍ने हो भने विपक्षी प्रशिक्षक सुरुवातमै हार खान्‍छन् । किनभने माने हरेक किसिमको गोल गर्छन् । पेनाल्टी बक्सबाट, लामो दुरीबाट, हेडर आदि । कुन कोणमा आफ्ना रक्षक राखेर मानेलाई रोक्ने ? फेरी माने तीब्र गतिमा खेल्छन् । उनलाई भेट्नै मुस्किल पर्छ ।

लिभरपुलले क्लपको नेतृत्वमा सफलता हासिल गर्दा मानेको भूमिका महत्वपूर्ण छ । तर उनलाई मोहम्मद सलाह जस्तो ग्लोबल स्टार मानिदैन । न त प्रिमियर लिगकै केभिन डे ब्रुएना वा ह्यारी केनसँग दाजेर हेर्ने गरिन्‍छ । कुनै पनि प्रकारको पुरस्कारका लागि योग्य ठानिदैन । सायद उनी विश्व फुटबलले मानेको अन्य स्ट्राइकहरुले जत्तिको संख्यामा गोल गर्दैनन् ।

गत सिजन प्रिमियर लिगमा उनी आफ्नै टिमको पनि सर्वोच्च गोलकर्ता बनेनन् । त्यस अघिको सिजनमा उनले सलाह र आर्सनलका पेयर एमरिक आबुमयाङलाई पछि पार्न सकेनन् । इंगल्यान्ड बाहिरका स्थापित स्ट्राइकरहरूसँग त उनको तुलना हुने नै भएन । रोबर्ट लेवेन्डोस्की, लियोनल मेस्सी, क्रिस्टियानो रोनाल्डो, सिरो इम्मोबिले लगायतका फरर्वाडहरू प्रत्येक सिजन गोल गर्नमा माने भन्दा अगाडि रहन्‍छन् ।

तर फेरी प्रश्न उही । के मानेलाई खेलमा रोक्न सजिलो छ ? छैन । प्रत्येक सिजन उनी झन् झन् बलियो बन्दै गइरहेका छन् । भलै तथ्यांकले उनलाई युरोपका अरु स्टारहरूको प्रतिस्पर्धी नबनाउँला । उनको उपस्थिती लिभरपुल र सेनेगलको राष्ट्रिय टिमका लागि अपरिहार्य छ ।

लिभरपुलले लिग वा च्याम्पियन्स लिगमा कस्तो लय देखाउने भन्‍ने निर्धारण, मानेको लयले गर्छ । उनी एउटा पास वा ‘मुभमेन्ट’ ले खेल परिवर्तन गराउने सार्मथ्य राख्छन् । विपक्षि सर्मथकहरूका लागि त माने डरलाग्दो नाम हो । एकैछिन सोचौं त, ‘वान भर्सेस वान’ मा माने विरुध्‍द कुनै पनि टिमको रक्षक ।

अन्य अफ्रिकी खेलाडी जस्तै माने शारीरिक रुपमा बलिया छन् । अनि उनको कौशल पनि उच्च स्तरको छ । उनी ‘लेफ्ट फुट’, ‘राइट फुट’ दुबैबाट आक्रमण बुन्‍न सक्छन्, अनि निर्णायक समयमा ‘टर्न’ लिन माहिर छन् । विवेकपूर्ण खेल देखाउँछन् । खेललाई फरक दिशातर्फ मोड्‌न सक्छन् ।

लिभरपुलले गत सिजन च्याम्पियन्स लिगको उपाधि रक्षा गर्न सकेन । तर क्लप नेतृत्वको लिभरपल युरोपियन क्लब फुटबलमा अझै बलियो मानिन्‍छ । लिभरपुलसँग हरेक विभागमा स्तरीय खेलाडीहरू छन् तव न इंग्लिस च्याम्पियन घरेलु लिग र युरोपमा बलियो मानिन्‍छ । त्यसमाथि मानेको उपस्थितीले त लिभरपुललाई अप्रत्याशित टिम बनाएको छ । उनी कुनै पनि बेला मैदान छिरेर गोल गर्न सक्छन् । असिस्ट प्रदान गर्न सक्छन् । माने आर्कषक खेलेर सर्मथकहरूलाई मनोरञ्जन दिन्‍छन् । आखिर फुटबलको उदेश्य मनोरञ्जन दिनु पनि त हो । माने त्यही तथ्यमा अडिग छन् ।