ओलीको १० बुँदे निर्देशनमा के छ ?

काठमाडौं : नेकपा (केपी ओली समूह)ले १० बुँदे अन्तरपार्टी निर्देशन जारी गरेको छ । सोमबार नेकपा अध्यक्ष तथा प्रधानमन्त्री केपी शर्मा ओलीले १० बुँदे अन्तरपार्टी निर्देशन जारी गरेका हुन् ।

नेकपा ओली समूहले निकालेको विज्ञप्तिमा पुस ७, ८ र ९ गते बसेको केन्द्रीय कमिटीको तेस्रो पूर्ण बैठकले १० बुँदे अन्तरपार्टी निर्देशन जारी गरेको हो । अन्तरपार्टी निर्देशन भनेर जारी गरिएको विज्ञप्तिमा ओली समूहले प्रतिनिधि सभा विघटन गर्नुको दोष अर्का अध्यक्ष पुष्पकमल दाहाललाई लगाएको छ ।

दाहालले लगातार प्रधानमन्त्री ओलीको राजीनामा माग्‍नुका साथै सांसदको फर्जी हस्ताक्षर लिएर अविश्वासको प्रस्ताव संसद्‍ सचिवालयमा दर्ता गरेपछि बाध्य भएर प्रतिनिधि सभा विघटन गर्नु परेको उल्‍लेख गरेका छन् ।

ओलीले बैशाख १७ र २७ गते हुने चुनाव सफल पार्नका लागि कार्यकर्तालाई तयारी थाल्न निर्देशन दिएका छन् । दाहाल र माधव नेपालले लगातार घेराबन्दी गरेपछि बाध्य भएर प्रतिनिधिसभा विघटन गरिएको दाबी ओेलीको छ । 

पार्टी कार्यकर्तालाई प्रशिक्षण तथा आगामी चुनाव सम्पन्‍न पार्न ओलीले सातै प्रदेशमा नेताहरुलाई जिम्मेवारी तोक्‍नुका साथै केन्द्रीय कमिटी विस्तार गरेर १५ सय पुर्‍याएका छन् । ओलीले मनोनित गरेका सदस्यलाई केन्द्रीय कमिटी बैठकले अनुमोदन गरेपछि ओली समूहको केन्द्रीय कमिटी संख्या १ हजार ५ सय १ पुगेको हो । 

यस्तै नेकपा ओली समूहको केन्द्रीय कमिटी बैठकले १६ बुँदे निर्णय गरेको पनि जनाएको छ । बैठकले दिवंगत भएका नेता कार्यकर्तालाई श्रद्धाञ्जली दिनेदेखि उखु किसानको बक्यौता भुक्तानीका लागि पहल गर्न सरकारलाई आग्रह गर्ने निर्णय गरेको छ । 

यस्तै चुनाव सफल पार्न नेता कार्यकर्तालाई आह्वान गर्ने, विप्लव समूहबाट मारिएका मोरङको मिक्लाजुङ गाउँपालिकाका शिक्षक राजेन्द्र श्रेष्ठको हत्याको भर्त्सना गर्ने लगायतका निर्णय पनि गरेको छ । पुस ५ गते प्रधानमन्त्री ओलीको सिफारिसमा राष्ट्रपति विद्यादेवी भण्डारीले प्रतिनिधि सभा विघटन गरेपछि नेकपाबाट दाहाल- नेपाल समूह अलग्गिएको थियो ।

प्रतिनिधि सभा विघटनविरुध्द दाहाल-नेपाल समूह सडक आन्दोलनमा उत्रिएको छ भने ओली समूह विघटनको बचाउ गर्दै चुनावमा जानुपर्नेमा जोड दिदै आएको छ ।