लघुवित्तहरूलाई पुर्नकर्जा दिँदै राष्ट्र बैंक, माघ १२ सम्म आवेदन दिनुपर्ने

काठमाडौं : नेपाल राष्ट्र बैंकले लघुवित्तहरूलाई पुर्नकर्जा दिन आवेदन खुलाएको छ । राष्ट्र बैंकले प्रदान गर्ने पुर्नकर्जा कुल पुनकर्जा प्रदान गर्न सकिने रकमको १० प्रतिशतभन्दा बढी हुँदैन ।

लघुवित्तले अघिल्लो त्रैमासको पुँजीकोषको अधिकतम् ६५ प्रतिशतसम्म पुर्नकर्जा माग गर्न पाउनेछन् । विगत तीन वर्षभित्र सञ्‍चालक समितिका पदाधिकारीहरू तथा कार्यकारी प्रमुखलाई कारबाही नभएको हुनुपर्ने प्रावधान छ ।

पुर्नकर्जाका लागि लघुवित्तहरूले माघ १२ सम्म आवेदन दिनुपर्नेछ । यो अवधिभित्र लघुवित्तहरूले आफ्‍ना प्रत्येक शाखाबाट लघु, घरेलु तथा साना उद्यम, विशेष र साधारण पुर्नकर्जा पाउने ऋणीका लागि एउटा शाखा बराबर पाँच ग्राहकले सुविधा पाउने गरी निवदेन दिनुपर्ने हुन्छ । पुर्नकर्जाका सम्बन्धमा नेपाल राष्ट्र बैकबाट सबै शाखाले न्यूनतम पाँच आवेदन अनिवार्य रुपमा पेश गर्नुपर्ने व्यवस्था छ । भर्खरै सञ्चालनमा आएका शाखाको हकमा शाखा सञ्चालनमा आएको ६ महिनासम्म सो व्यवस्था अनिवार्य हुँदैन ।

निवदेन बुझाउने म्याद सकिएको १ महिनामा राष्ट्र बैंकले पुर्नकर्जा सम्बन्धी निर्णय गर्नेछ । पुर्नकर्जा स्वीकृत गर्दा पूर्ण वा आंशिकरूपमा पुर्नकर्जा स्वीकृत गर्नेछ ।

त्यसपछि तालिका बनाई विभिन्न चरणमा अलग अलग किस्तामा पुर्नकर्जा उपलब्ध गराउने कार्यविधिमा उल्लेख छ । तरलताको अवस्था सहज भएमा एकैपटक उपलब्ध गराउन पनि सकिने राष्ट्र बैंकले जनाएको छ ।

कोभिड-१९ बाट प्रभावित व्यवसायीलाई राहत दिन पुर्नकर्जा कार्यविधि जारी गरेको थियो । तर, कोभिड-१९ को प्रभाव न्यूनीकरणको लागि मात्र पुर्नकर्जाको व्यवस्था गरिएको भने होइन । कोभिड- १९ को महामारी सुरु हुनुभन्दा अघि पनि पुर्नकर्जाको व्यवस्था थियो । राष्ट्र बैंकले प्रदान गर्ने पुर्नकर्जा र सहुलियतपुर्ण कर्जामा ब्याज अनुदान एकै किसिमका सुविधा होइनन् ।

पुर्नकर्जाको लागि विद्यमान निर्देशन अनुसार ऋणीले आफ्नो व्यवसायमा कम्तीमा २० प्रतिशत पुँजी लगानी गरेको हुनु पर्दछ । नेपाल राष्ट्र बैंकवाट बैंक तथा वित्तीय संस्थाले प्रवाह गरेको कर्जा वापत पुर्नकर्जा रकम प्रदान गरिने भएकोले पुर्नकर्जा सुविधामा समावेश भएका ग्राहक ऋणीले ब्याजदरमा सहुलियत मात्र प्राप्त गर्दछन् । थप कर्जा रकम प्राप्त गर्दैनन् ।

पुर्नकर्जाको अवधि नसकिँदै पुर्नकर्जाको सुविधा प्राप्त गर्ने ग्राहक ऋणीले चाहेमा आफ्नो कर्जा रकम चुक्ता गर्न सकिन्छ । यसरी रकम चुक्ता गर्दा पुर्नकर्जा लिए वापत कुनै पनि किसिमको अतिरिक्त शुल्कहरू तिर्नु पर्दैन ।