देउवा र ओलीको ‘केमेस्ट्री’ मिलेपछि अगाडि सर्‍याे निर्वाचन

काठमाडौँ– सत्तारुढ गठबन्धनका सहयात्री माओवादी केन्द्र र नेकपा एकीकृत समाजवादीको चाहाना विपरित मन्त्रीपरिषद्को आजको बैठकले स्थानीय तहको निर्वाचन वैशाख ३० मा गर्ने निर्णय गरेको छ । 

निर्वाचन आयोगले जेठ ५ को मिति प्रस्ताव गरेकोमा सरकारले एक कदम अघि बढेर वैशाख ३० मै निर्वाचन गर्ने निर्णय गरेको हो । 

माओवादी केन्द्रका अध्यक्ष पुष्पकमल दाहालले स्थानीय तहको निर्वाचन पछाडि सारेर त्यसभन्दा अघि संघीय संसदको निर्वाचन गर्न गठबन्धनमा प्रस्ताव गरेका थिए ।

संविधान र स्थानीय तह निर्वाचन ऐन, २०७३ को प्रावधान बाझिएको भन्दै उनले स्थानीय तहको निर्वाचन गाउँसभा/नगरसभाको म्याद सकिएको ६ महिनाभित्र गर्न सकिने संविधानको व्यवस्था अनुसार ऐन संशोधनको प्रस्ताव गरेका थिए । 

तर आइतबार स्थानीय तहको चुनाव, एमसीसीसँगको सम्झौता लगायतका विषयमा छलफल गर्न तीन दलका शीर्ष नेताको बैठक बसेको थियो । कांग्रेस र एमालेले भने स्थानीय तहका जनप्रतिनिधिको पदावधि सकिने पाँच वर्षभित्रै निर्वाचन गराउनुपर्ने मत राख्दै आएका थिए ।