कर्णाली सरकारविरुद्ध उच्च अदालतमा रिट दायर

सुर्खेत – कर्णाली सरकारविरुद्ध उच्च अदालत सुर्खेतमा रिट दायर भएकाे छ ।

कर्णाली प्रदेशको मन्त्रिपरिषद्‌को गठन तथा पुन: गठन गर्दा समावेशी नभएको भन्दै अधिवक्ता शेरबहादुर खत्री र इन्सेक प्रदेश कार्यालय सुर्खेत कार्यरत लेखा अधिकृत टिका विष्टले रिट दायर गरेका हुन् । मुख्यमन्त्री तथा मन्त्रिपरिषदको कार्यालय र प्रदेश प्रमुखको कार्यालयलाई विपक्षी बनाएर रिट दायर गरिएको छ ।

पछिल्लो पटक पाँच जना मन्त्री थप्न प्रदेश प्रमुखको कार्यालयले गरेको निर्णय बदर गर्न, नियुक्त भएका मन्त्रीहरूलाई कामकाज गर्न नदिन, समावेशी सिद्धान्तका आधारमा महिला र दलितको प्रतिनिधित्व हुनेगरी पुनः मन्त्रिपरिषदको गठन तथा विस्तार गर्न विपक्षीको नाममा उपयुक्त आदेश जारी गर्न माग गर्दै रिट दायर गरिएको हाे ।