शेखरले दाहालसँग भने- माओवादी कार्यकर्ताले कांग्रेसलाई कहिल्यै भोट हाल्दैनन्, कांग्रेस एक्लै चुनाव लड्छ

फाइल फाेटाे

काठमाडौँ - नेपाली कांग्रेसका नेता शेखर कोइरालाले माओवादी केन्द्रका अध्यक्ष पुष्पकमल दाहालसँग भेटवार्ता गरेका छन् । दाहाल र कोइरालाको भेट आज बिहान दाहालनिवास खुमलटारमा भएको हो । 

भेटमा सत्ता गठबन्धन, एमसीसी परियोजना, संसदको अवरोध हटाउने तथा चुनावी गठबन्धनको विषयमा छलफल भएकाे कोइरालाको सचिवालयले जनाएको छ । कोइरालाले दाहाललाई एमसीसी संसदमा टेबुल गर्न सुझाएका थिए । 'एमसीसीका बारेमा धेरै अलमल गर्नुभएन स्वीकार या अस्वीकार गर्ने संसदबाटै हुनुपर्छ', कोइरालाको भनाइ उद्धृत गर्दै सचिवालयले भन्यो ।  छलफलमा कोइरालाले संसदलाई बन्धक बनाउन नहुँने भन्दै भएका समस्याहरू संसदबाट छिनोफानो गर्नुपर्ने बताएका थिए । 

दाहालले स्थानीय चुनावमा गठबन्धन गरेर जानुपर्ने बताएका थिए । कोइरालाले दाहाललाई आफू चुनावी गठबन्धनको पक्षमा नभएको स्पष्ट धारणा राखेका थिए । कोइरालाले कांग्रेसले माओवादीलाई भोट हालेपनि माओवादी कार्यकर्ताले कांग्रेसलाई कहिल्यै भोट नहालेको र आम कांग्रेस कार्यकर्ता पनि गठबन्धनको विरुद्ध रहेकाले कांग्रेस गठबन्धनको पक्षमा नरहेको बताएका थिए । 

दुई दिन अघि कोइरालाले नेकपा एमालेका अध्यक्ष केपी शर्मा ओलीसँग पनि भेटवार्ता गरेका थिए ।