लागूऔषध ओसारपसारमा संलग्नहरू पक्राउ

काठमाडौं–प्रहरीले विभिन्न स्थानबाट लागूऔषध ओसारपसारमा संलग्नहरूलाई पक्राउ गरेको छ । पक्राउ परेकाहरूबाट लागूऔषधसमेत बरामद गरिएको हो।
प्रहरीकाअनुसार मोरङ, बाँके र सुर्खेतबाट कारोबारमा संलग्नहरूलाई पक्राउ गरेको हो 

बाँके, नेपालगञ्ज उपमहानगरपालिका ४ बसपार्कबाट करिब २ ग्राम ५ सय ५० मिलिग्राम अवैध लागूऔषध ब्राउनसुगर जस्तो देखिने पदार्थसहित २ जनालाई बुधबार राति प्रहरीले पक्राउ गरेको छ । पक्राउ पर्नेहरुमा सोही उपमहानगरपालिका४ बस्ने अछाम तुर्माखाद गाउँपालिका ७ का र अछाम पंचदेवल बिनायक नगरपालिका ४ घर भएका २ जना १८ वर्षीय किशोर रहेका छन् । लागूऔषध नियन्त्रण व्यूरो नेपालगञ्ज र जिल्ला प्रहरी कार्यालय बाँकेबाट खटिएको प्रहरी टोलीले  उनीहरुलाई उक्त पदार्थसहित फेला पारी पक्राउ गरेको हो ।

त्यस्तै मोरङ, बिराटनगर महानगरपालिका(१५ स्थित १ नम्बर ढाटबाट करिब २ ग्राम ७ मिलिग्राम अवैध लागूऔषध ब्राउनसुगर सहित केरावारी गाउँपालिका ८ का ३५ वर्षीय मिकेनजी लिम्बुलाई बुधबार साँझ प्रहरीले पक्राउ गरेको छ। भारतबाट नेपालतर्फ आउँदै गरेको प्रदेश १.०२.०४१ प ६२५९ नम्बरको स्कुटरलाई लागूऔषध नियन्त्रण व्यूरोबाट खटिएको प्रहरीले जाँच गर्ने क्रममा स्कुटर चालक लिम्बुलाई उक्त लागूऔषध सहित फेला पारी पक्राउ गरेको हो।

प्रहरीले सुर्खेत, वीरेन्द्रनगर नगरपालिका ६ मंगलगडी चोकबाट करिब १ सय ६० मिलिग्राम अवैध लागूऔषध ब्राउन सुगर जस्तो देखिने पदार्थ सहित २ जनालाई प्रहरीले पक्राउ गरेको छ। पक्राउ पर्नेहरुमा वीरेन्द्रनगर नगरपालिका(२ बस्ने २५ वर्षीय अजय सिंह चौधरी र २६ वर्षीय राजु गायन रहेका छन्। कर्णाली प्रदेश प्रहरी कार्यालय सुर्खेत लागूऔषध नियन्त्रण ब्यूरो र जिल्ला प्रहरी कार्यालयबाट खटिएको प्रहरीले उनीहरुलाई उक्त परिमाणको लागूऔषध सहित फेला पारी पक्राउ गरेको हो। यस सम्बन्धमा प्रहरीले थप अनुसन्धान गरिरहेको छ।