प्रधान न्यायाधीशविरुद्धको आन्दोलन १ सय ७ औँ दिनमाः स्थगित आन्दोलन आजबाट सुरु

फाइल तस्‍बिर

काठमाडौँ - प्रधानन्यायधीश चोलेन्द्र शमशेर राणाको बहिर्गमनको माग गर्दै आन्दोलनरत नेपाल बार एशोसियनले आन्दोलनलाई पुनः निरन्तरता दिने भएको छ । कोभिड महामारीको कारण देखाउँदै पछिल्लो समयमा ‘भर्चुअल’ माध्यमबाट आन्दोलन गर्दै आएको बारले आइतबारबाट भौतिकरूपमा नै उपस्थित भएर पुनः आन्दोलन गर्ने थालेको हो  ।

‘फागुन १ गतेदेखि बिहान ११ः०० बजेदेखि १२ बजेसम्म सर्वोच्च अदालत केन्द्रित आन्दोलन कार्यक्रम भौतिकरूपमा निरन्तर जारी रहने’ महासचिव लिलामणि पौडेलले जानकारी दिए । उनका अनुसार गत २८ माघमा बसेको बार एशोसियसनको निर्णय अनुसार उक्त आन्दोलनको नयाँ कार्यक्रम मिति र स्वरुप तय गरिएको हो । 

बिगत १ सय ७ दिनदेखि न्यायपालिकाको शुद्धिकरण र सुदृढीकरणको लागि न्यायाधीश हरिकृष्ण कार्कीको संयोजकत्वको प्रतिवेदनको कार्यान्वयन र प्रधानन्यायाधीश राणाको राजीनामा माग पुरा नभएसम्म आन्दोलन जारी रहने महासचिव पौडेलको भनाइ छ ।