पोग्बाको गोलले म्यानचेष्टर युनाईटेड शीर्ष स्थानमा

काठमाडौं : झण्डै ८ बर्षपछि म्यानचेस्टर युनाइटेड इंग्लिस प्रिमियर लिग फुटबलको शीर्ष स्थानमा पुगेको छ । मंगलबार राति बर्नलीलाई १-० गोल अन्तरले पराजित गर्दै म्यानचेस्टर युनाइटेड पहिलोपटक लिगको शीर्ष स्थानमा पुगेको हो ।

बर्नलीको मैदानमा भएको खेलमा म्यान्युलाई शीर्ष स्थानमा पुर्‍याउन पउल पोग्बाले महत्वपूर्ण गोल गरे । खेलको ७१ औँ मिनेटमा पोग्बाले गरेको भली गोलबाट युनाईटेडको जित सुनिश्चित भएको थियो । 

पोग्बालाई मार्कुस रसफोर्डले पास दिएका थिए । जितपछि लिभरपुललाई पछि पार्दै शीर्ष स्थानमा पुगेको म्यान्चेष्टर युनाईटेडको १७ खेलबाट ३६ अंक भएको छ । दोस्रो स्थानमा रहेको लिभरपुलको ३३ अंक छ ।

प्रिमियर लिगमा मंगलबार राति भएका अरु खेलमा एभर्टन र शेफिल्ड युनाइटेड विजयी भएका छन् । एभर्टनले वुल्भ्सलाई २-१ र शेफिल्ड युनाईटेडले न्युक्यासललाई १-० गोल अन्तरले पराजित गरेका हुन् । (अन्तराष्ट्रिय सञ्चारमाध्यमको सहयोगमा)