एम्पाएरसँग जोडिए अनमोल

काठमाडौँ- अभिनेता अनमोल केसी एम्पाएर इन्टरनेसनल एजुकेसन एन्ड भिजा सर्भिसेससँग जोडिएका छन् । एक वर्षको लागि अनुबन्धित भएका अनमोलले फोटोसुट, टिभीसी (टेलिभिजन कमर्सियल )सँगै एम्पाएरले गर्ने विभिन्‍न सचेतनामूलक शैक्षिक कार्यक्रममा सहभागी हुनेछन् । उनले उच्च शिक्षा हासिल गर्ने विद्यार्थीलाई एम्पाएरको तर्फबाट सही सूचना पुर्‍याउने छन् ।

अनमोलले एम्पाएरको लागि फोटोसुटसँगै केही दिन अगाडि मात्र टिभीसी सुट गरिसकेका छन् । उनको टिभीसीलाई शैक्षिक शैलीमा तयार गरिएको सञ्चारकर्मी तथा निर्देशक कुवेर डंगोलले बताए । केही समय अगाडि डंगोलसँगै फोटोसुट सम्पन्‍न गरेका अनमोलले टिभीसीको काम पनि सकाएका हुन् ।

’हामीले टिभीएडको लागि २५ सेकेण्ड लम्बाई रहेको भिडियो तयार पारेका छौँ । यहाँ अस्ट्रेलिया पढ्न चाहने विद्यार्थीहरुको लागि छोटो सन्देश छोडिएको छ ’ निर्देशक डंगोलले भने । टिभीसीमा अनमोललाई क्याजुअल लुक्समै सरल तरिकाले प्रस्तुत गरिएको छ ।  

एम्पाएरले विद्यार्थीलाई दिँदै आएको सेवालाई ध्यानमा राख्दै टिभीसी तयार गरिएको निर्देशक डंगोलले जनाए ।  रंग पत्रकार राजन घिमिरेको कन्सेप्टमा तयार भएको टिभीसीमा उत्सव दाहालको छायांकन, विकास दाहालको सम्पादन तथा कलर करेक्सन रहेको छ ।