एभरेस्ट एकेडेमी र अत्तरीया विजयी

फाइल फाेटाे

कैलाली - धनगढीमा जारी धनगढी मेयर लिटल फ्लावर प्रिमियर लिग यु–१९ विद्यालय स्तरीय टी–ट्वान्टी प्रतियोगिताको दोश्रो दिनको पहिलो खेलमा एभरेस्ट एकेडेमी अत्तरीया विजयी भएको छ ।

धनगढी स्थित संघीय प्रहरीको खेल मैदानमा सम्पन्न खेलमा होलिल्याण्डले दिएको ६३ रनको लक्ष्य ७.५ ओभरमा भेट्टाउदै एभरेस्ट विजयी भएको हो । १ विकेट क्षतिमा एभरेस्टको ब्याटिङमा योगेश भाटले सर्वाधिक ४२ रन बनाए ।

उनले २८ बलमा ३ चौका र ४ छक्का प्रहार गरे। त्यस्तै सन्दिप बिस्टले १२ रन बनाए । यस अघि टस जितेर ब्याटिंग गरेको होलिल्याण्डले १०.६ ओभरमा ६२ रनमा सम्पूर्ण विकेट गुमाएको थियो।

होलिल्याण्डको लागि सन्दिप औजीले १६ तथा अभिषेक पालले १२ रन जोडेका थिए । एभरेस्ट एकेडेमीका लेग स्पिनर कृष ऐरले सर्वाधिक ३ ओभरमा ११ रन मात्र खर्चेर ५ विकेट लिए ।

यस्तै गोविन्द बिस्टले दुई तथा दिपक रोकायाले एक विकेट लिए। खेलको प्लेयर अफ द म्याच एभरेस्ट एकेडेमीका कृष ऐर घोषित भए । उनले दुई हजार रुपैयाँ नगद समेत प्राप्त गरे। आजको दोश्रो खेल गुरुकुल र स्टेपिङ स्टोनका बीचमा दिउँसो १:३० बजे हुने छ ।