नेपाल बन्दका कारण लुम्बिनी प्रदेशको जनजीवन प्रभावित, बाँकेमा तीन जना बन्दकर्ता प्रहरी नियन्त्रणमा

बुटवल - विप्लव नेतृत्वको नेकपासहित ५ राजनीतिक दल र १ मोर्चाको संयुक्त रूपमा घोषणा गरेको नेपाल बन्दका कारण बिहानैबाट लुम्बिनी प्रदेशमा पनि पूर्ण प्रभाव परेको छ । राष्ट्रघाती एमसीसी खारेजीको माग गर्दै विभिन्न जिल्लाका मुख्य बजारहरू पूर्णरूपमा बन्द रहेका छन् ।

लामो तथा छोटो दुरीका सवारी साधनहरू चल्न सकेका छैनन् । बन्दले रोकिएका सवारी साधन प्रहरीले स्कटिङ गर्दै गन्तव्यमा पुर्‍याइरहेका छन् । त्यस्तै शैक्षिक संस्थाहरू पनि बन्द भएका छन् । बन्दमा कुनै पनि अप्रिय घटना हुन नदिनका लागि बजारका चोकहरूमा सुरक्षा व्यवस्था तैनाथ गरिएको छ ।

बन्दकर्ताहरूले पार्टीका झन्डासहित बजार परिक्रमा गरेका छन् । उता बाँकेको नेपालगन्जबाट तीनजना बन्दकर्तालाई नियन्त्रणमा लिएको प्रहरीले जनाएको छ । जबर्जस्ती बन्द गराउदै हिडेको र सडकमा टायर बाल्न खोज्दै गरेको अवस्थामा नेपालगन्जको गणेशमान चोक नजिकबाट नेकपा माओवादी केन्द्र समाजवादीका केन्द्रीय सदस्य सलमान राई, जिल्ला अध्यक्ष अजित प्रसाद (भगत सिंह) र विप्लव नेतृत्वको नेकपाका कार्यकर्ता वसन्त खत्रीलाई नियन्त्रणमा लिइएको बाँके प्रहरी प्रवक्ता प्रहरी नायव उपरीक्षक मधूसुदन न्यौपानेले जानकारी दिए ।

एमसीसीको बिरोधमा आज मोहन वैद्य नेतृत्वको नेकपा (क्रान्तिकारी माओवादी), नेत्रविक्रम चन्द (विप्लव) नेतृत्वको नेपाल कम्युनिस्ट पार्टी, ऋषि कट्टेल नेतृत्वको नेकपा, आहुती नेतृत्वको वैज्ञानिक समाजवादी पार्टी र कर्णजित बुढाथोकी नेतृत्वको नेकपा माओवादी केन्द्र समाजवादी तथा सीपी गजुरेल नेतृत्वको देशभक्त गणतान्त्रिक मोर्चा नेपालले देशव्यापी बन्द आह्वान गरेका हुन् ।

यस्तै बाँकेको बैजनाथ गाउँपालिकामा सुदुरपश्चिम प्रदेशको कृषि मन्त्रालयको गाडिमा तोडफोड भएको छ । पूर्वपश्चिम राजमार्ग अन्तरर्गत बैजनाथ बनकटवा चोकमा बिहान साढे ५ बजेतिर बन्दकर्ताहरुले सो गाडिमा तोडफोड गरेका हुन् । बाँकेका ट्राफिक प्रहरी प्रमुख हिमालय शाहका अनुसार सुदुरपश्चिम प्रदेश ०१—००१ झ ४०१ नम्बरको कृषि मन्त्रालयको गाडीमा तोडफोड गरेको बताए ।