१० मिनेटको संसद् बैठकमा ९ मिनेटसम्म नाराबाजी

फाइल फोटो

काठमाडौँ : शुक्रबार पनि दिउँसो १ बजेपछि प्रतिनिधि सभा बैठक बस्यो । तर १० मिनेटसम्म चलेको बैठक ९ मिनेटसम्म अवरोध भयो । सभामुख अग्नि सापकोटाले बैठकको कारबाही सुरु भएको बताएलगत्तै प्रमुख प्रतिपक्षी दल एमालेका सांसद रोष्टम घेराउ गर्न पुगेका थिए ।

एमालेले अवरोध गरेपछि केही समयसम्म सभामुख सापकोटाले उनीहरुको नाराबाजी सुनिरहे । यसबीचमा सभामुख सापकोटाले कोरोना महामारीका कारण संसद् बैठक नियमित हुन नसकेको र संसद् बैठकमा अवरोध कायम रहँदा जनताका भावना समेटिन नसकेको भन्दै बैठक सञ्चालनका लागि आग्रह गरेका थिए ।

तर प्रतिपक्षी दलका सांसदले संसद्को अवरोध कायमै गरिरहे । त्यो क्रम ८ मिनेटसम्म चल्यो । तर नाराबाजी रोकिने संकेत नपाएपछि सभामुख सापकोटाले अवरोधकाबीच ‘आदिवासी जनजाति आयोगको प्रतिवेदन’ पेश गर्न कानूनमन्त्री दिलेन्द्र बडुलाई पोडियममा बोलाए । मन्त्री बडुले आयोगको प्रतिवेदन पेश गरे ।

तर छलफलको वातावरण बनेन । बैठक सुरु भएलगत्तै एमाले सांसदको नाराबाजी चलेको थियो । बैठक चल्न सक्ने नदेखेपछि सभामुख सापकोटाले प्रतिनिधिसभाको अर्को बैठक फागुन ८ गते आइतबार १ बजे बस्ने भन्दै स्थगित गरे । 

सभामुख सापकोटा आफ्नो आसनबाट उठेर हिँडेपछि एमाले सांसदको नाराबाजी रोकियो । अनि क्रमशः सांसदहरु बैठकस्थलबाट बाहिरिए । यो क्रम लगातार चलिरहेको छ । शुक्रबारको बैठकमा एमसीसी कार्यसूचीमै थिएन ।