लोकतान्त्रिक गणतन्त्रलाई सबल र सुदृढ तुल्याउन आवश्यक: प्रधानमन्‍त्री

काठमाडौँ - प्रधानमन्त्री शेरबहादुर देउवाले जननिर्वाचित प्रतिनिधिबाट मुलुकको शासन व्यवस्था सञ्चालन गर्ने पद्धतिलाई सुदृढ तुल्याउन सरकार प्रतिबद्ध रहेको बताएका थिए । ७२औं राष्ट्रिय प्रजातन्त्र दिवसका अवसरमा मूल समारोह समितिले सैनिक मञ्च टुँडिखेलमा आयोजना गरेको विशेष कार्यक्रममा प्रधानमन्त्री देउवाले अब छिट्टै सम्पन्न हुने स्थानीय तह र त्यसलगत्तै हुने प्रदेश तथा सङ्घीय तहको चुनाव सम्पन्न गरी जननिर्वाचित प्रतिनिधिबाट मुलुकको शासन व्यवस्था सञ्चालन गर्ने पद्धतिलाई सुदृढ तुल्याउन सरकार प्रतिवद्ध रहेको बताए ।

देउवाले सबै चुनावलाई निष्पक्ष, स्वतन्त्र र भयरहित वातावरणमा सम्पन्न गराउनुपर्नेमा जोड दिए ।  उनले प्रज्ञातन्त्र दिवसको दिन जनतालाई रैतीबाट नागरिक बनाउन, उनीहरूको मौलिक हकअधिकार स्थापित गर्न र शासन व्यवस्थामा जनताको प्रतिनिधित्व सुनिश्चित गराउन सफलता प्राप्त भएको दिनका रूपमा इतिहासमा स्मरणीय भएको उल्लेख गरे ।

सङ्घीय लोकतान्त्रिक गणतन्त्रात्मक र समावेशी शासन प्रणालीलाई सबैले थप सबल र सुदृढ तुल्याउन आवश्यक रहेको उहाको भनाइ छ । उनले कोभिड–१९ को प्रकोपलाई नियन्त्रण गर्न सरकारले देशभर खोप लगाउने अभियानलाई तीव्रता दिएको  र यस कार्यमा उल्लेखनीय सफलता पनि हासिल भएको बताए । सरकारले स्वास्थ्य पूर्वाधार सेवा विस्तार र सुदृढीकरण गरी महामारीलाई नियन्त्रणमा ल्याउन र अर्थतन्त्रलाई चलायमान बनाउन सक्दो प्रयास भइरहेको उनको भनाइ छ ।