सरकार जनताको मालिक होइन, सेवक बनोस्ः ओली

पाेखरा- नेकपा एमालेका अध्यक्ष केपी ओलीले सरकार जनताको मालिक नभई सेवक बन्नुपर्ने बताएका छन् । गण्डकी प्रदेशमा आयोजित अगुवा पार्टी भेला तथा पार्टी प्रवेश कार्यक्रममा बोल्दै ओलीले शासक नभइ सेवकको भूमिकामा सरकार बस्नुपर्ने बताएका हुन् ।

नेपालमा अब समान सुविधा सबै जनताले पाउने गरी काम गर्नुपर्ने ओलीले बताए । शिक्षा, स्वास्थ्य र अन्य आधारभूत सेवामा कोही पनि छुट्नु नहुने भन्दै समुचित विकास गर्नुपर्ने बताए । यसका लागि ओलीले अरु पार्टीमा अलमलिएर बस्नुको सट्टा नेकपा एमालेमा प्रवेश गरी देश विकासमा लाग्नुपर्ने बताए ।

स्वास्थ्य, योग, ज्योतीष विज्ञान, शल्यक्रिया नेपालबाट सुरु भएको ओलीले बताए । वेद नेपालमै लेखिएको र लेखिनु अघि नेपालकै भूमिमा श्रुतीका रुपमा रहेका उनले बताए । ‘हाम्रा अभिभावक अन्वेषक थिए, आविष्कारक थिए । हामी त्यस्ताका सन्तान हौं, केही कारणले आज हामी केही शताब्दि पछाडि पर्यौं,’ ओलीले भने ।