'फोडेनले इंगल्यान्डको राष्ट्रिय टोलीमा मौका पाउनुपर्छ'

काठमाडौँ : म्यानचेस्टर सिटीका प्रशिक्षक पेप ग्वार्डिओलाले आफ्नो क्लबका फिल फोडेनलाई आउँदो युरो कपका लागि इंगल्यान्डको राष्ट्रिय टिममा स्वत छनौट गरिनु पर्ने बताएका छन् । जारी सिजनमा सबैखाले प्रतियोगितामा गरी आठ गोल गरिसकेका फोडेन इंग्लिस मिडफिल्डको पहिलो रोजाई हुनुपर्ने ग्वार्डिओलाको भनाई थियो । 

बुधबार प्रिमियर लिगमा सिटीलाई ब्राइटनविरुध्‍दको खेल जिताउन गोल गरेका फोडेनलाई प्रशिक्षक ग्वार्डिओलाले जारी सिजनमा पर्याप्त मौका दिइरहेका छन् । ‘फोडेनले यस सिजन चेल्सी, म्यानचेस्टर युनाइटेड जस्ता टिमका विरुध्‍द खेल्दा निडरपूर्वक खेलेका छन् । यदि म इंगल्यान्डको प्रशिक्षक हुन्थे भने फोडेनलाई निश्चय पनि मौका दिन्थे,’ ग्वार्डिओलाले भने,‘यी युवा मिडफिल्डरको खेलले ग्यारेथ साउथगेट पनि म जस्तै खुशी भएको हुनुपर्छ । त्यसकारण मलाई आशा छ फोडेनले आउँदो युरोमा मौका पाउनेछन् ।’

सन् २०१७ मा इंगल्यान्डले अण्डर-१७ विश्वकप जित्दा फोडेन महत्वपूर्ण खेलाडी रहेका थिए । त्यसपछिका वर्षमा उनलाई सिनियर टिममा बढुवा गरिएपनि पर्याप्त खेल्ने मौका भने दिइएको छैन । उनले राष्ट्रिय टिमका लागि तीन वर्षमा तीन खेल मात्र खेलेका छन् । ‘फोडेन विशेष प्रतिभा हुन् । उनी दुवै दायाँ बायाँ दुवै खुट्टाले आक्रमण बुन्‍छन् । उनी उच्च स्तरको फुटबल खेल्न सक्षम छन्,’ ग्वार्डिओलाले २० वर्षीय मिडफिल्डरको प्रशंसामा भने ।  

भरपर्दा मिडफिल्डर डेभिड सिल्भाले सिटी छाडेपछि उनको ठाउँमा खेल्न सक्ने खेलाडीका रुपमा फोडेनलाई लिइँदै आइएको छ । गत सिजन २३ लिग खेल खेल्दै पाँच गोल र दुई असिस्टको योगदान गरेका फोडेनले यस सिजन १२ खेलमा छ गोल र असिस्ट दर्ता गरिसकेका छन् । मिडफिल्डमा जुनसुकै भूमिका पनि निर्वाह गर्नसक्ने फोडेनले पछिल्ला दुई खेलमा लगातार गोल गर्न सफल भएका छन् । 

लिगमा शीर्ष दुईका म्यानचेस्टर युनाइटेड र लिभरपुलको भन्दा दुई खेल कम खेलेको सिटीले ३२ अंक बटुलेको छ । चौँथौ र पाँचौ स्थानका लेस्टर सिटी र एभरटनको पनि ३२ अंक नै रहेको अवस्थामा सिटीले आगामी खेलमा पनि जितको श्रृङ्खलालाई कायम राख्नुपर्नेछ । ती खेलहरुमा फोडेनको भूमिका महत्वपूर्ण रहने अपेक्षा गरिएको छ । खेलमा गोलको अवसर सिर्जना गर्नमा मात्रै होइन, गोल गर्न पनि माहिर फोडेनलाई इंगल्यान्डको राष्ट्रिय टोलीमा पक्कै स्थान दिइने छ । इंगल्यान्ड अर्को वर्ष युरोपका १२ सहरमा हुने च्याम्पियनसिपमा सहभागी हुँदैछ । प्रतियोगिताको समूह डी मा रहेको इंगल्यान्डले समूह चरणमा क्रोएसिया, चेक गणतन्त्र र स्कल्यान्डको समना गर्नेछ ।