शिवरात्रीमा स्यानिटाइजर र मास्कको प्रयोग अनिवार्य

काठमाडौँ- पशुपति क्षेत्र विकास कोषले महाशिवरात्रीमा स्वयंसवकहरूलाई दर्शनार्थीलाई सभ्य भाषा र सुंस्कृत व्यवहार गर्न अनुरोध गरेको छ । महाशिवरात्रीमा पशुपतिनाथ मन्दिरमा पाँच हजार स्वयंसेवकहरू परिचालित हुने भएका छन् ।

आइतबार पशुपति क्षेत्र विकास कोषले गरेको पत्रकार भेटघाट कार्यक्रममा स्वयंसेवकहरू दर्शनार्थीको सहजीकरण गर्न कोर क्षेत्रका बाहिर परिचालित गरिने प्रवक्ता नारायण प्रसाद सुवेदीले जानकारी दिए । यसपटकको शिवरात्री आगामी मंगलबार १७ गते परेको छ । 

कोभिड-१९ को महामारी जोखिम रहेकाले स्वास्थ्य सुरक्षाका मापदण्ड पालना गरी दर्शनार्थीलाई स्यानिटाइजर र मास्कको अनिवार्य प्रयोग गर्न लगाइएको उनले बताए ।दर्शनार्थीको सुरक्षार्थका लागि नेपाल प्रहरीको अगुवाईमा सशस्त्र प्रहरी र राष्‍ट्रिय अनुसन्धान विभागबाट समेत सुरक्षाकर्मी परिचालन गरिने उनले जानकारी दिए ।

भकुण्डोलमा नेपाल प्रहरी र सशस्त्र प्रहरीका मूल शिविर हुनेछ । मेला क्षेत्र र दर्शनमार्गलाई लक्षित गरी सिसि क्यामेरा समेत राखिने उनले सुवेदीले बताए । पशुपति क्षेत्र नशालुपदादर्थ निषेधित क्षेत्र भएकाले मदिरा, गाँजा, जाँड-रक्सी जस्ता पदार्थहरूको बिक्रीवितरण,ओसारपसार, भण्डारण एवं प्रयोगमा बन्देज लगाइने उनको भनाइ छ । पशुपति क्षेत्र प्लाष्‍टिक निषेधित क्षेत्र भएकाले भोजन,चिया र पानी वितरण गर्दा प्लाष्‍टिकको कप प्रयोग गर्न नपाइने भएको छ ।

ज्येष्‍ठ नागरिक, शारीरिक रुपमा अशक्त एवं अपाङगता भएका व्यक्तिहरूलाई लाईनमा नराखी स्वयंसेवकहरूले वनकालीको २ नम्बर गेटबाट इलेक्ट्रिक टेम्पोबाट आवतजावतको व्यवस्था मिलाइएको उनले बताए ।

विकास कोषले दर्शनार्थी तथा साधु सन्तहरूका लागि हंशमण्डप,वनकाली र तीलगंगाको क्षेत्रलाई आवास क्षेत्र तोकिएको छ । ९५ वटा संघसंस्थाले निःशुल्क भोजन, पानी र चिया वितरण गर्ने व्यवस्था मिलाएको छ । आवास क्षेत्र नजिक शौचालयको व्यवस्था  फोहोर व्यवस्थापन गर्न डस्टविनको व्यवस्था गरिएको छ । प्लाष्‍टिकको कप र प्लेट पूर्ण रुपमा प्रतिबन्ध लगाइएको छ ।

साधुसन्तका लागि आवश्यक भोजन, पानी र आवासको व्यवस्था निःशुल्क व्यवस्था गरिएको सुवेदीले बताए । साधुसन्तका लागि धुनीको व्यवस्था भएको र महाशिवरात्री सम्पन्‍न भएपछि रुद्राक्षमाला दक्षिणाको व्यवस्था साधुसन्त र बाबाहरूलाई विदाइ गरिने उनले प्रस्ट पारे ।