न हिन्दीमा दर्शक न नेपालीमा

काठमाडौं :  लामो समयको अन्तराल पछि हलमा ताजा फिल्म रिलिज भए । पुस १० गतेबाट हल खुले पनि कुनै पनि निर्माता नयाँ फिल्म रिलिज गर्न तयार भएनन् । बीचमा एकाध अंग्रेजी फिल्म प्रदर्शनका लागि तम्सिएका थिए तर सरकारले ती फिल्म रिलिज हुने वातावरण नबनाएपछि पुराना फिल्मका पोस्टर फेरिएनन् । पुस २६ मा सरकारले मापदण्ड बनाएर हल खोल्ने निर्णय गर्यो ।

योसँगै नयाँ फिल्म रिलिज हुने वातावरण पनि बन्यो । सरकारले हल खोल्ने औपचारिक निर्णय गर्नु अघि नै पाका अभिनेता शिव श्रेष्ठले आफूले निर्माण गरेको ‘एउटा यस्तो प्रेम कहानी’ प्रदर्शन गर्ने घोषणा गरेका थिए । घोषणा अनुरुप नै बिहीबारबाट यो फिल्म रिलिज भयो । सँगसँगै रिलिज भयो, तमिल फिल्म ‘मास्टर’ । लामो समय हल बन्द रहेकाले नयाँ फिल्म रिलिज हुँदा दर्शकको राम्रो चाप होला भन्ने अनुमान थियो । तर बिहीबारबाट रिलिज भएका नेपाली न हिन्दी दुवै फिल्ममा दर्शक आएनन् । बिहीबार जबकि सार्वजनिक विदा पनि थियो । 

‘एउटा यस्तो प्रेम कहानी’ मल्टिस्टारर फिल्म थियो । शिव श्रेष्ठदेखि प्रियंका कार्की, वर्षा राउत, आयुष्मान देशराज जोशीसम्मका कलाकार फिल्मको पोस्टरमा छन् । तर, फिल्ममा भएका कलाकार जति पनि दर्शक हलमा नभएको हल म्यानेजरहरू बताउँछन् । बिहीबार न शुक्रबार दुवै दिन ‘एउटा यस्तो प्रेम कहानी’मा दर्शक छैनन् । काठमाडौं क्षेत्र वितरण गरेका गोपालकाजी कायस्थले पनि हलमा दर्शक नभएको स्वीकारे । माहोल बनाउन फिल्म रिलिज गरेको उनले बताए ।
‘दर्शक आउँछन् भन्ने हामीलाई पनि आश होइन । चलायमान बनाउन कसै न कसैले रिस्क लिन पथ्र्यो त्यो शिव दाइले लिनु भयो । कमसेकम नयाँ फिल्म रिलिज त भयो नी,’ कायस्थले भने । 

नेपाली मात्र होइन सोही दिन रिलिज भएको ‘मास्टर’ हेर्न पनि दर्शकले रुचि देखाएनन् । तुलनात्मक रुपमा नेपाली फिल्मभन्दा धेरै सो पाएको ‘मास्टर’मा दर्शकको खडेरी छ । तमिलमा बनेर हिन्दी डबमा नेपाल आएको यो फिल्मले भारतमा भने कीर्तिमानी व्यापार गरिरहेको छ । पहिलो दिन ४० करोड ग्रस गरेको फिल्मले दोस्रो दिन २३ करोड ग्रस गरेको समाचार आएका छन् । तर नेपालमा भने वितरकले महंगो रकम तिरेर ल्याएको फिल्मले कमजोर व्यापार गरेको छ । 
यी दुई फिल्मको व्यापारले हल र वितरकको चिन्ता झन् बढाएको छ । यी दुई फिल्मको व्यापार राम्रो हुँदो हो त निर्माता नयाँ फिल्म रिलिज गर्न सायद तम्सन्थे । तर, त्यो नभए पछि हल लयमा फर्कन अझै समय लाग्ने संकेत देखिएको छ ।