अन्तिम विकेटहरू लिन नसक्नु भारतीय क्रिकेट टिमको पुरानै समस्या : गावस्कर

काठमाडौं : भारतीय क्रिकेट टिमका पूर्व कप्तान सुनिल गावस्करले भारतीय बलरले अन्तिम विकेटहरू लिन नसक्नु नयाँ समस्या नभएको प्रतिक्रिया दिएका छन् ।ब्रिसबेनमा जारी अस्ट्रेलिया र भारतबीचको अन्तिम टेस्टको पहिलो दिन सकिएपछि गावस्करले त्यस्तो प्रतिक्रिया दिएका हुन् । 

‘भारतीय बलरहरू खेलमा सुरुवाती विकेट लिन सक्छन् । तर अन्तिमका पाँच विकेट लिन उनीहरू सधै संघर्षरत रहन्छन् ।’ गावस्करले भारतीय टेलिभिजन सोनी स्पोटर्ससँग कुरा गर्दै भने, ‘टि–टाइम सम्म भारतले खेलमा नियन्त्रण राख्यो । यदि अरु केही विकेट हात परेको भए भारतले अस्ट्रेलियालाई पूर्णरुपमा दबाबमा राख्‍न सक्थ्यो ।,’ 

खेलमा भारतका टि नटराजनले दुई विकेट लिँदै घरेलु टिमलाई दबाबमा राख्‍न खोजे पनि अस्ट्रेलियाले पाँच विकेटको क्षतिमा दुई सय ७४ रन बनायो । अन्तिमका पाँच विकेट लिन नसके पनि जसप्रित बुमराह, इशान्त शर्मा, मोहम्मद शामी, रविचन्द्र आश्विन र रविन्द्र जडेजा बिना मैदान ओर्लिएको भारतीय बलिङले सन्तोषजनक खेल देखाएको गावस्करको भनाई थियो ।

घरेलु टिमका विरुद्ध अन्तिम टेस्ट खेल्दै गरेको भारतका लागि महत्वपूर्ण बलर मैदान बाहिर रहेको बेला डेब्यु गरेका नटराजन र वासिङटन सुन्दरका बारेमा गावस्करले प्रशंसा गरे । ‘डेब्यु खेलमै नटराजनले दुई तथा सुन्दरले एक विकेट लिए । अर्का नयाँ खेलाडी मोहम्मद सिराजले पनि राम्रो बलिङ गरे । टेस्टमा कम अनुभव भएको यो बलिङ युनिटले पाँच विकेट लिनु भनेको ठूलो उपलब्धि हो । यसले उनीहरु खेलमा कती प्रतिबद्ध छन् भन्‍ने देखाउँछ ।,’ गावस्करले भने ।