फुटबलः  राष्ट्रिय महिला लिग माघ ७ बाट

काठमाडौं : अखिल नेपाल फुटबल संघ (एन्फा)ले आयोजना गर्ने राष्ट्रिय महिला लिग माघ ७ बाट सुरु हुने भएको छ । विभागीयसहित कुल सात टोलीले भाग लिने प्रतियोगिता एक महिनासम्म सञ्चालन गरिने एन्फाले जनाएको छ । 

त्रिभुवन आर्मी क्लब, शसस्त्र प्रहरीको एपीएफ क्लब, नेपाल पुलिस क्लबसँगै चौदण्डीगढी नगरपालिका, वालिङ नगरपालिका, चन्द्रपुर नगरपालिका र विराटनगर महानगरपालिकाले महिला लिगमा भाग लिनेछन् । लिगको उद्घाटन तथा समापन खेल दशरथ रंगशालामा हुने भए पनि बाँकी खेल भने सातदाबाटोस्थित एन्फा कम्पलेक्समा खेलाइने एन्फाले जानकारी दियो ।  

लिग विजेता टोलीले पन्ध्र लाख नगद पुरस्कार पाउनेछ भने लिगमा दोस्रो, तेस्रो र चौंथौं स्थानमा रहने टिमहरूले क्रमशः आठ लाख, पाँच लाख र तीन लाख प्राप्त गर्नेछन् । लिगमा उत्कृष्ट घोषित हुने स्ट्राइकर, मिडफिल्डर, रक्षक, गोलरक्षक र प्रशिक्षकलाई जनही पचास हजार प्रदान गरिने पनि एन्फाले जानकारी दिएको छ । 
लिगमा सहभागी हुने टिमबाट २३ खेलाडी र सात अफिसियल सहित ३० सदस्य टोली काठमाडौं आउनेछन् । प्रत्येक टिमले चार जना सम्म विदेशी खेलाडी अनुबन्ध गर्न समेत सक्ने एन्फाले जनाएको छ ।

एन्फाले लिगमा सहभागी हुने टिमहरूलाई तयारी गर्नका लागि एक–एक लाख र कोभिड–१९ राहत कोष अन्र्तगत पचास हजार उपलब्ध गराउनेछ । लिग दौरान कोभिड–१९ संक्रमणमा पर्ने खेलाडी वा अफिसियललाई एन्फाले नै आइसोलेसनमा राख्ने पनि बताइएको छ ।