भदौ २४ मा सृष्टि–सौगातको ‘राधा’

काठमाडौँ  - महामारीको तेस्रो लहर मथ्थर भएसँगै नेपाली निर्माता ÷निर्देशकले धमाधम प्रदर्शन मिति सार्वजनिक गर्न लागेका छन् । कम्तिमा पनि निर्माताले दसैँसम्मका मिति ‘बुक’ गर्न थालेका छन् । 

पहिलो र दोस्रो महामारीको बीचमा खिचिएको सुवर्ण थापा निर्देशित फिल्मले पनि प्रदर्शन मिति तोकेको छ । निर्देशक सुवर्ण थापाका अनुसार यो फिल्म अब भदौ २४ मा प्रदर्शन हुनेछ । ‘सिक्रेट्स अफ राधा’ शीर्षकको यो फिल्मले शिवरात्रीको अवसर पारेर फस्टलुक सार्वजनिक गर्दै प्रदर्शन मिति सार्वजनिक गरेको हो । 

सुवर्ण थापाकै लेखन रहेको फिल्ममा दर्जन हाराहारी थिएटर पृष्ठभूमिका कलाकारको अभिनय रहेको छ । यो फिल्मलाई सौगात मल्ल र सृष्टि श्रेष्ठ मिलेर निर्माण गरेका हुन् । फिल्ममा सौगात र सृष्टिका अलावा खगेन्द्र लामिछाने, दयाहाङ राई आदि कलाकारको पनि अभिनय रहेको छ ।

दयाहाङ फिल्ममा अतिथि भूमिकामा छन् । नरेन्द्र मैनालीको छायांकन रहेको फिल्मको सुटिङ मकवानपुरको दामन वरिपरि गरिएको थियो । यो फिल्मको सुटिङ २५ दिनमा सकिएको थियो । निर्देशक सुवर्ण थापाले फिल्मको पोस्ट प्रडक्सन फ्रान्समा भइरहेको जानकारी गराएका छन् ।