म्यानचेस्टर युनाइटेडका पोग्बा भन्छन्- लिभरपुल नै बलियो टिम

काठमाडौं : प्रिमियर लिगको शीर्षस्थानमा रहेको म्यानचेस्टर युनाइटेडका मिडफिल्डर पउल पोग्बाले आफ्नो टिम लिभरपुलको स्तरमा पुगि नसकेको बताएका छन् । लिग अंक तालिकामा युनाइटेड दोस्रो स्थानको लिभरपुल भन्दा तीन अंकले माथि भए पनि मर्सीसाइड टोली नै बलियो भएको पोग्बाको भनाई थियो ।

लिभरपुललाई बलियो टिम माने पनि विश्वकप विजेता पोग्बाले युनाइटेड लिग जित्‍न सक्ने टिम रहेको बताए । ‘निश्चय पनि हामी लिभरपुलको स्तरमा पुगि सकेको छैनौं । लिभरपुलले लिग विजेता टिम हो, यदि हामीले यो सिजन लिग जित्यौं भने मात्रै हामी उनीहरूको स्तरमा पुग्‍ने छौं । यो सिजन लिग उपाधि होड खुल्ला छ । धेरै टिम लिग जित्‍न सक्षम छन् । हामी पनि लिग जित्‍न सक्ष्म छौ । तर त्यस यात्रामा हामी अझै पर नै छौं,’ पोग्बाले भने ।

फ्रेन्च मिडफिल्डरले युनाइटेड लिभरपुल जस्तो टिमविरुध्‍द हाबी भए मात्रै लिगमा आफु बलियो टिम भएको सिद्ध गर्न सकिने बताए । ‘हामीले बलियो टिमलाई पराजित गरे मात्रै आफु पनि बलियो भएको महसुस गर्नेछौ । लिभरपुल केही वर्षयता लगातार राम्रो फुटबल खेल्दै आइरहेको छ । त्यसकारण लिभरपुलविरुध्‍दको खेल हाम्रो लागि सजिलो हुनेछैन ।’

युनाइटेड र लिभरपुल लिगको महत्वपूर्ण खेलमा आउँदो आइतबार आमनेसामने हुँदैछन् । १७ खेलको समाप्तीमा शीर्ष दुईमा रहेका यी दुई टिमबीचको खेल लिग उपाधि दौड अझ रोचक बनाउनेछ । त्यसो त एनफिल्डमा हुने खेल युनाइटेड प्रशिक्षक ओले गनर सोल्स्यारका लागि ठूलो परीक्षा हो । गत साता इएफएल कपको सेमिफाइनल खेल हारेको युनाइटेडलाई लिभरपुलसँगको खेल जित्दै आफु इंगल्यान्डको शक्ति नै रहेको सन्देश दिनु छ । सोल्स्यार ओल्ड ट्राफोर्डमा प्रशिक्षकका रुपमा आएपछि युनाइटेडले घरेलु कप र युरोपा लिगमा गरी लगातार चार सेमिफाइनल गुमाएको छ । त्यसैले एनफिल्डमा विजय प्राप्त गरी सोल्स्यार आफ्नो छवी बलियो बनाउने धुनमा हुनेछन् ।

लिभरपुलले सन् २०१७ अप्रिल यता एनफिल्डमा कुनै पनि लिग नहारेकाले युनाइटेडका लागि आइतबारको खेल सहज भने हुने छैन । तर लामो समय आलोचित रहेका पोग्बाले पछिल्ला खेलहरुमा राम्रो लय देखाएकाले युनाइटेड उत्साहित छ । लिगमा पछिल्ला तीन खेलमा विजय पाउन नसकेको लिभरपुलले आफ्ना पहिलो रोजाईका रक्षकहरु त गुमाएको छ नै, साथै अग्रपंक्ति पनि सुस्ताएको जस्तो देखिन्छ । लिभरपुलका विश्वस्तरिय फरवार्डहरुले गत दुई लिग खेलमा गोल नै गर्न सकेनन् भने त्यसअघि कमजोर वेस्टब्रुमसँगको बराबरीमा एक भन्दा बढी गोल गरेनन् । त्यसकारण, युनाइटेडविरुध्‍दको खेल योर्गेन क्लपका लागि आफ्ना स्ट्राइकरहरुलाई ब्युताउने मौका हुन सक्छ ।