क्लपको लिभरपुल सामना गर्नु अगावै सन्यास लिएर राम्रो गरे : एलेक्स फर्गुसन

काठमाडौं : म्यानचेस्टर युनाइटेडका पूर्व प्रशिक्षक एलेक्स फर्गुसनले लिभरपुल प्रतिको आफ्नो सम्मान सधैं कायम रहने बताएका छन् । प्रिमियर लिगमा सर्वाधिक सफल प्रशिक्षक दरिएका फर्गुसनले योर्गेन क्लप नेतृत्वको लिभरपुलको सामना गर्नु अगावै  सन्यास लिएर राम्रो गरेको पनि भन्‍न भ्याए । 

‘लिभरपुलले पछिल्ला दुई सिजनमा अभुतपूर्व खेल देखाएको छ । धन्न मैले सन्यास लिए नत्र यस्तो बलियो टिमको समाना गर्नुपर्ने हुन्थ्यो,’ फर्गुसनले शुक्रबार लिग प्रशिक्षकहरुको कार्यक्रमलाई ठट्यौली पारामा सम्बोधन गर्दै भने, ‘युनाइटेडसँगै लिभरपुल बेलायतको सर्वाधिक सफल क्लब हो । मैले लिभरपुललाई सधैं सम्मान गरेको छु ।’

फर्गुसनले आफ्नो २७ वर्षे कार्यकालमा युनाइटेडलाई २७ प्रिमियर लिग उपाधि दिलाएका थिए । फर्गुसन युनाइटेड आउनु अघि लिभरपुल इंगल्यान्डको सर्वाधिक सफल क्लब रहेकोमा स्कटिस प्रशिक्षकले आफ्नो सन्यास अघि मर्सीसाइड क्लबलाई पछाडि धकेलिदिए । तर फर्गुसनले सन् २०१३ मा युनाइटेड छाडेपछि जर्मनीका क्लपको नेतृत्वमा लिभरपुलले पुनरागमन गरेको छ । लिभरपलले गत सिजन प्रिमियर लिग जित्यो भने त्यस अघि च्याम्पियन्स लिग उपाधिमा कब्जा जमायो । उता युनाइटेडले भने पछिल्ला आठ वर्षमा लिग जित्‍न सकेको छैन । 

सोही कार्यक्रममा फर्गुसनले लिभरपुलका कप्तान जोर्डन हेन्डरसनको प्रशंसा पनि गरे । आफु युनाइटेडको प्रशिक्षक हुँदा हेन्डरसनलाई अनुबन्ध गर्न खोजेको तर मेडिकल टिम सहमत नहुँदा सन्डरल्यान्डका पूर्व मिडफिल्डरको ओल्ड ट्राफोर्ड स्थान्तरण सफल हुन नसकेको उनको भनाई थियो । ‘मेरो मेडिकल टिमले हेन्डरसनको दौडने तरिका ठिक नभएको र भविष्यमा चोट बोकीरहने सम्भावना भएको भनेपछि स्थान्तरण स्थगित भयो । तर हेन्डरसन उत्कृष्ट खेलाडी रहेकोमा चाँही म त्यसबखत पनि सहमत थिए ।’ फर्गुसनले भने ।