वासिङटन र शार्दुलको ब्याटिङले उकासियो भारत

काठमाडौं : ब्रिसबेनमा जारी चौंथौं टेस्टको तेस्रो दिनमा वासिङटन सुन्दर र शार्दुल ठाकुरको सन्तोषजनक ब्याटिङको सहयोगमा भारतले अस्ट्रेलियाविरुध्द तीन सय ३६ रन बनाएको छ । पाहुना टोलीलाई आइतबार खेलमा पुनरागमन गर्न डेब्यु गर्दै गरेका सुन्दरले ६२ र ठाकुरले सर्वाधिक ६७ रनको योगदान गरे । 

सुन्दरले एक सय ४४ बलमा सात चौका र एक छक्का प्रहार गरे । ठाकुरले नौ चौका र दुई छक्का प्रहार गरे । शनिबार ६२/२ को अवस्थामा रहेको भारतका लागि तेस्रो दिन कप्तान अजिन्क्या रहानलेले ३७ रन बनाए । 

मिचेल स्टार्कको बलमा आउट हुनुअघि भारतीय कप्तानले ९३ बलको समाना गर्दा तीन चौका प्रहार गरे । 
चेतेश्वर पुजाराले २५ रन बनाए भने भारतले दोस्रो सेसनको ब्याटिङ सुचारु गर्दा मायान्क अग्रवाल र रिसभ पन्तलाई सस्तैमा गुमायो । अग्रवाल ३८ रनमा समेटिए भने पन्तले २३ रन मात्र बनाउन सके । 

मध्यक्रमका ब्याट्सम्यानहरूलाई सस्तैमा गुमाउँदा धरमर बनको भारतीय इनिङलाई सुन्दर र ठाकुरले उकासेका थिए । 

अस्ट्रेलियाले दोस्रो इनिङको सुरुवात गर्दा मार्कस ह्यारिस र डेभिड वारनर क्रिजमा छन् । ह्यारिस एक रनमा ब्याटिङ गरिरहेका छन् भने वार्नरले २२ बलको सामना गर्दै २० रन जोडेका छन् ।