यामलाल कँडेल भन्छन्, ‘स्वतन्त्र विचार राख्ने अवस्था रहेनछ’

काठमाडाैं : कर्णाली प्रदेशका मुख्यमन्त्री महेन्द्रबहादुर शाहीविरुद्धको अविश्वासको प्रस्ताव अस्वीकृत भएपछि सांसद यामलाल कँडेलले उक्त निर्णय अनौठो नभएको बताएका छन्। आफूले अविश्वासको प्रस्ताव दर्ता गराएलगतै मुख्यमन्त्री निलम्बित भइसकेकोले अहिले बसेको बैठक अनधिकृत रहेको प्रस्तावको नेतृत्वकता कँडेलले दाबी गरे।

‘अविश्वासको प्रस्ताव अस्वीकृत हुने कुरा अनौठो होइन। पेश गरिसकेपछि दलको नेताले अनधिकृत तवरले सचेतक परिवर्तन गर्नुभयो। निलम्बित भइसकेको अवस्थामा उहाँ(मुख्यमन्त्री)ले प्रमुख सचेतकलाई कारवाही गर्नुभयो। उहाँले कसरी कारबाही गर्न सक्नुहुन्छ? बैठक कसरी बोलाउन सक्नुहुन्छ?’, इकागजसँग कँडेलले भने, ‘अनधिकृत रुपमा बसेको बैठकले गरेको निर्णय पनि विधिसम्वत् हुन्छ त ?’

आफू काठमाडौंमै रहेको बताउँदै कँडेलले संसदीय दलको निर्णय दलको विधानविपरित भएको समेत दाबी गरे। विधान र प्रक्रियाविपरित सांसदहरूलाई विभिन्न प्रलोभन देखाएर आजको बैठक राखिएको उनले आरोप लगाए। ‘विषयमा छलफल गरेर सांसदलाई सहमत गराएको होइन। पद, प्रतिष्ठा वितरण गरेर सांसहरूलाई सहमत गराइयो ।’ उनले अगाडि भने।

अब तपाईँहरू के गर्नुहुन्छ? भन्ने प्रश्नमा उनले भने, ‘नेकपामा अब नयाँ विषय थपियो। अब यस्तै पद्धति बसाल्ने त? हामी आफ्ना कुरा राख्दै जाने हो। यसले के पुष्टि गर्छ भने नेकपामा स्वतन्त्र रुपमा विचार राख्ने अवस्था रहेनछ। विवाद कायमै छ।’

शुक्रवार कर्णाली प्रदेशसभा संसदीय दलको बैठकले शाहीविरुद्धको प्रस्ताव बहुमतले अस्वीकृत गरेको छ । बैठकमा १८ जना सांसदले मुख्यमन्त्रीको पक्षमा देखिएपछि अविश्वासको प्रस्ताव अस्वीकृत भएको हो ।

असोज २५ गते कर्णाली प्रदेशका सांसदहरुले मुख्यमन्त्री शाहीविरुद्ध अविश्वासको प्रस्ताव दर्ता गराएका थिए । सत्तारुढ दल नेकपाकै १८ जना सांसदहरुले अविश्वासको प्रस्ताव दर्ता गरेपछि त्यसको प्रभाव केन्द्रमा पनि देखिएको थियो ।

विवाद समाधानका लागि कर्णालीका नेताहरूलाई काठमााडौं बोलाइएको थियो। केन्द्रमा लामो समय छलफल भए पनि विवाद समाधानका लागि कुनै ठोस निर्णय हुन सकेन।