कति बढ्यो पेट्रोल, डिजेल र मट्टितेलको मूल्य ?

काठमाडौं : नेपाल आयल निगमले पेट्रोलिय पदार्थको मूल्य बढाएको छ । निगमले सोमबार राती १२ बजेदेखि लागू हुने गरी पेट्रोल, डिजेल र मट्टीतेलको मूल्य प्रतिलिटर दुई-दुई रुपैयाँले बढाएको हो ।

नयाँ मूल्यअनुसार काठमाडौं उपत्यकामा पेट्रोल एक सय १० रुपैयाँ र डिजेल तथा मट्टीतेल प्रतिलिटर ९३ रुपैयाँ पर्नेछ । पछिल्लो डेढ महिनामा इन्डियन आयल कर्पोरेसन आइओसीबाट मूल्य अचाक्ली बढेर आएकाले यसपटक मूल्य बढाउनुपरेको आयल निगमका प्रवक्ता विनीतमणि उपाध्यायले बताए ।

‘पछिल्लो डेढ महिनामा हामीले नेपाली बजारमा इन्धन मूल्य समायोजन गरेका छैनौँ । यो अवधिमा प्रतिलिटर पेट्रोलमा ७.६१ रुपैयाँ, डिजेलमा ६.३९ रुपैयाँ, मट्टीतेलमा ६.०४ रुपैयाँ, हवाई इन्धनमा ६.९० रुपैयाँ बढेर आइसकेको छ ।

'खाना पकाउने एलपी ग्यासमा १९.०६ रुपैयाँ प्रतिसिलिन्डर बढेर आएको छ,’ निगमका प्रवक्ता उपाध्यायद्धारा जारी विज्ञप्तीमा भनिएको छ, ‘यति ठूलो मूल्यवृद्धिलाई हामीले थेगेर उपभोक्तालाई मार पर्नबाट बचायौँ । यसपटक भने बाध्य भएर बढाएका छौँ ।’

मूल्य बढाएपनि निगमलाई घाटा रहेको उनको दाबी छ ।